शुभम देशमुख, भंडारा

Bhandara Teacher Physically Abused Girl Student भंडाऱ्यात शिक्षक आणि विद्यार्थिनींच्या नात्याला काळीमा फासणारी एक घटना उघड झाल्याने खळबळ उडाली आहे. ५३ वर्षीय शिक्षकानं इयत्ता चौथीच्या पाच विद्यार्थिनींशी अश्लील चाळे केल्याचा संतापजनक प्रकार घडला आहे. या प्रकरणाची माहिती मिळताच शिक्षकाला चांगलाच चोप देण्यात आला. तसेच आरोपीविरोधात गुन्हा दाखल करत अटक करण्यात आली आहे.

मिळालेल्या माहितीनुसार, भंडारा जिल्ह्यातील पवनी येथील जिल्हा परिषद शाळेत ५३ वर्षीय शिक्षकानं इयत्ता चौथीच्या पाच विद्यार्थिनींशी अश्लील चाळे केल्याचा संतापजनक प्रकार घडला. याप्रकरणाविषयी मुलींनी आपल्या पालकांना सांगितली. संतप्त पालकांनी आज सकाळी शाळेत जाऊन नराधम शिक्षकाला जाब विचारत चांगलाच चोप दिला.

त्यानंतर या पालकांनी शिक्षकाला पवनी पोलिसांच्या ताब्यात दिलं. वडेगावच्या या शाळेत इयत्ता पहिली ते चौथ्या वर्गात १९ विद्यार्थी शिक्षण घेत आहेत. यातील पाच विद्यार्थिनींसोबत या शिक्षकाने लैंगिक छळ केला आहे.

पवनी पोलिसांनी शिक्षकावर पॉक्सो (POCSO), विद्यार्थ्यांना धमकावणे, मारणे या प्रकारचे गुन्हे दाखल केले असून शिक्षकाला अटक केली आहे.या घटनेनंतर मुली विद्येच्या मंदिरात देखील सुरक्षित नसल्याचं चित्र पाहायला मिळत आहे.