बीडच्या परळी विधानसभा मतदारसंघात घाटनांदुर येथील मतदान केंद्रात तोडफोड करण्यात आली. यावेळी ईव्हीएम मशीन देखील फोडण्यात आले. या मतदान केंद्रावर सध्या गोंधळाचे वातावरण आहे. पोलिसांकडून सध्या तपास सुरू आहे. आता या घटनेविरोधात राष्ट्रवादी काँग्रेस अजित पवार गटाचे उमेदवार धनंजय मुंडे आक्रमक झाले आहेत. या घटनेविरोधात निवडणूक विभागाकडे तक्रार करणार असल्याचे धनंजय मुंडे यांनी म्हटले आहे.

'जे तुतारीचे उमेदवार दहशत आणि दादागिरीची भाषा बोलत होते. आज त्यांचे चिरंजीव मशीन फोडत असून बूथ कॅप्चरिंग करण्याचा प्रयत्न करत आहेत.', असा आरोप धनंजय मुंडे यांनी केला. तर दहशत नेमकी कुणाची? हे तुतारीच्या वरिष्ठ नेत्यांना कळाल पाहिजे, असा सवाल देखील धनंजय मुंडेंनी उपस्थित केला.

'आजपर्यंत ३० वर्षांच्या कालावधीत असं गालबोट कुठे लागलं नाही. त्यामुळे दहशत करायची ही माणसिकता आहे. याबाबत प्रशासनाला देखील तात्काळ कारवाई करण्यात यावी.', अशी मागणी धनंजय मुंडे यांनी केली आहे.