आगामी स्थानिक स्वराज्य संस्थांच्या निवडणुकांची रणधुमाळी सुरू आहे. महायुती तसेच महाआघाडीतील नेत्यांनी कंबर कसली आहे. प्रचारासाठी नेते मंडळी स्टार प्रचारकसोबत मैदानात उतरले आहेत. अशातच बीड जिल्ह्यात मात्र राष्ट्रवादी काँग्रेसमधील आमदारांमधील वाद चव्हाट्यावर येऊ लागला आहे. पदाधिकारी आणि कार्यकर्तेंमधील वाद तर होतेच, मात्र आता आमदारांमधील वाद देखील जनतेसमोर येऊ लागले आहेत. बीडमधील माजलगाव मतदारसंघाचे आमदार प्रकाश सोळंके यांनी 'स्टार प्रचारक म्हणून आमदार धनंजय मुंडे यांना माझ्या मतदारसंघात पाठवू नका', असा थेट निरोप पक्षाला पाठवलाय.

'स्टार प्रचारक म्हणून धनंजय मुंडे यांना माझ्य मतदारसंघात पाठवू नका. अशी माहिती मी पक्षाला दिलीय', असे स्पष्ट विधान आमदार प्रकाश सोळंके यांनी केले आहे. 'धनंजय मुंडे इथे येऊन नेमका कोणता स्टारपणा दाखवणार आहेत? स्टार प्रचारक म्हणून त्यांचे काम परळीतच राहावे. ते माजलगावात आले तर, वेगळ्याच प्रकारचा विपरकीत परिणाम घडू शकतो', असं देखील सोळंके म्हणाले.

'परळीत मुंडे बहीण भावांची युती होते. मग जिल्ह्यात का होत नाही? युती होऊ नये म्हणून काहींनी प्रयत्न केले. युती करण्यासाठी कोणीही पुढाकार घेतला नाही, हे दुर्दैव आहे', असं देखील सोळंके म्हणाले. 'स्थानिक स्वराज्य संस्थांमध्ये युती करणे अवघड असते. बीड जिल्ह्यात फक्त परळीत युती होते. इतर ठिकाणी युतीसाठी कोणीही प्रयत्न करत नाही, हीच खंत आहे,' असेही सोळंके म्हणाले.

'या निवडणुकीत आम्ही आमची ताकद दाखवून देऊ. धनंजय मुंडे आणि पंकजा मुंडे यांनी युतीसाठी कोणतेही प्रयत्न केले नाहीत. उलट युती होऊ नये यासाठीच जास्त प्रयत्न झाले, असेच मला वाटते,' असं प्रकाश सोळंके म्हणाले. 'परळीत युती जमते आणि इतर ठिकाणी जमत नाही, हे मुंडे बहीण-भावांना विचारले पाहिजे. स्टार प्रचारक म्हणून धनंजय मुंडे यांना माझ्या भागात येण्याचे कारण नाही. त्यांनी परळीतच प्रचार करावा. ते आमच्या भागात आले तर विपरित परिणाम होईल. त्यामुळे धनंजय मुंडेंना माझ्याकडे न पाठविण्याची विनंती मी पक्षाला केली आहे', असं प्रकाश सोळंके म्हणाले.