बीड : बीडमध्ये संतोष देशमुख हत्या प्रकरणावरून राजकीय वातावरण तापलं आहे. या प्रकरणावरूनही राजकीय पक्षांच्या कार्यकर्त्यांकडून एकमेकांवर आरोप-प्रत्यारोप केले जात आहेत. या प्रकरणाचं लोण आता सोशल मीडियापर्यंतही पोहोचलं आहे. यानंतर बीड पोलीस ॲक्शन मोडवर आले आहेत. सोशल मीडियावरून दहशत निर्माण करणाऱ्या पोस्ट व्हायरल केल्यास अथवा फॉरवर्ड केल्यास कठोर कारवाई करू. तसेच गुन्हा दाखल करण्यात येईल, असा इशारा पोलीस अधीक्षक नवनीत कावत यांनी जनतेला आवाहन केलं आहे.

पोलीस अधीक्षक नवनीत कावत यांनी काढलेल्या पत्रात म्हटलं की, जिल्हयातील सर्व जनतेला आवाहन करण्यात येत आहे की, कोणीही मोबाईल आणि इंटरनेटचा वापर करुन आपल्याकडे असलेले वैध अथवा अवैध शस्त्राचे फोटो व्हिडिओ सोशल मीडियाद्वारे प्रदर्शित करु नये. तसेच एखाद्या हाणामारीच्या घटनेतील रेकॉर्ड केलेला फोटो व्हिडिओ, शिव्या देतांनाचा व्हिडिओ अथवा समाजात दहशत किंवा भिती निर्माण होईल, अशी कोणतीही पोस्ट कोणत्याही सोशल मीडिया अकाउंटवरुन शेअर करु नये'.

'समाजात तेढ निर्माण करणारे मेसेज फॉरवर्ड करु नये. तसेच ज्यांनी कोणी यापूर्वी अशा प्रकारच्या पोस्ट सोशल मीडियाद्वारे प्रदर्शित केल्या असतील, शेअर केल्या असतील किंवा फॉरवर्ड केल्या असतील. त्या त्यांनी तात्काळ सोशल मीडियावरुन डिलीट कराव्यात', असंही त्यांनी सांगितलं.

'सोशल मीडियावर अशा प्रकारे कोणीही शस्त्राचे, हाणामारीचे अथवा शिवीगाळ किंवा समाजात भीती आणि दहशत निर्माण होईल, असे फोटो व्हिडिओ प्रदर्शित करील. लाईक करील किंवा फॉरवर्ड करील, जुन्या पोस्ट आहेत. त्यांनी आम्ही दिलेल्या सूचनेनंतर पोस्ट केल्या नाहीत, तर अशा व्यक्तीविरुद्ध तत्काळ भारतीय न्याय संहिता, माहिती तंत्रज्ञान अधिनियम तसेच कायद्यान्वये योग्य ती कठोर कायदेशीर कारवाई करण्यात येईल, असा इशारा पोलीस अधीक्षक कावत यांनी दिला आहे.