बीड : मागील काही दिवसांपासून बीड जिल्ह्यात उन्हाचा कडाका वाढला असून तापमान ४३ अंशावर पोहोचले आहे. उष्णतेच्या झळा अधिक तीव्र असून वाढलेल्या तापमानामुळे उष्मघाताचा त्रास होऊन एका भाजी विक्रेत्याचा मृत्यू झाल्याची घटना परळीमध्ये घडली आहे. 

बीड (Beed) जिल्ह्यात मागील काही दिवसांपासून उन्हाची तीव्रता वाढत आहे. या दरम्यान गेल्या ३ दिवसात तापमानात सातत्याने वाढ होत असल्याने नागरिक उकाड्याने हैराण झाले आहेत. दरम्यान परळी येथे एका भाजीपाला विक्रेत्याचा उष्माघाताने मृत्यू झाला आहे. परळी (Parali) येथील बाजारपेठेत महादेव संभाजी गुट्टे हे भाजीपाला विक्री करतात. भर दुपारी देखील ते बाजारात भाजी विक्रीचे काम करत होते. दरम्यान त्यांना अचानक भोवळ आली. यानंतर त्यांना रुग्णालयात दाखल केले. डॉक्टरांनी त्यांना मृत घोषित केले.

उष्माघात टाळण्यासाठी हे करा 

तापमान वाढीमुळे शरीरातील पाण्याच्या कमतरतेमुळे आरोग्याला धोका निर्माण होऊ शकतो. प्रामुख्याने (Temperature) तीव्र उन्हात काम करताना शरीरातील पाणी कमी होत असते. यामुळे उष्माघात होण्याची शक्यता असते. यामुळे भरपूर पाणी, द्रव्य पदार्थ, फळांचा रस प्यावा. तसेच घट्ट कपडे वापरणं टाळावेत. काळे किंवा गडद रंगाचे कपड्यांऐवजी फिक्या रंगाचे कपडे घालावेत. दुपारी उन्हात बाहेर जाणे शक्यतो टाळा. कुलर किंवा एसीमधून लगेच उन्हात जाणे टाळावे. बाहेर जाताना टोपी किंवा रुमाल डोक्यावर असावा.