बीड :  बीड शहरातून अंधश्रद्धाविषयी पुन्हा एक खळबळजनक बातमी समोर आली आहे. तांत्रिक विद्या अवगत करून पैशांचा पाऊस पाडतो, आम्ही तुला मालामाल करतो, असे म्हणत बीड शहरातील एका लॅब टेक्निशीयनला तब्बल ४५ लाख २३ हजार ३१५ रुपयांचा गंडा घातला आहे. या प्रकरणी बीडच्या शिवाजीनगर पोलीस ठाण्यामध्ये ६ जणांविरोधात गुन्हा दाखल करण्यात आला आहे.

बीड (Beed) शहरातील शेख अझहर शेख जाफर असे सदरच्या प्रकारात फसवणूक झालेल्या व्यक्तीचे नाव आहे. शेख अझहर शेख जाफर यांना पैशाचा पाऊस पाडून तुला मालामाल करतो; असे आमिष हमीद खान ऊर्फ बाबू करीम खान व इतरांनी दिले. यासाठी मांत्रिकांनी शेख अझहर याच्याकडून रोख २४ लाख व फोन पे द्वारे २१ लाख २३ हजार ३१५ रुपये उकळले. मात्र ही रक्कम घेऊन मांत्रिक पसार झाले.  

६ जणांवर गुन्हा दाखल 

सदर प्रकारात आपली फसवणूक (fraud) झाल्याचे शेख अझहर यांच्या निदर्शनास आल्यानंतर त्यांनी याबाबत शिवाजीनगर पोलीस ठाण्यात फिर्याद दाखल केली आहे. या प्रकरणी हमीद खान ऊर्फ बाबू करीम खान (रा. बीड), जिलानी अब्दुल कादर सय्यद (रा. औसा जि. लातूर), सविता पवार (रा. पुंडलिक नगर संभाजीनगर), शेख समीर शेख अहमद (रा. जालना), उत्तम भागवत (रा. घोलपवाडी ता. इंदापूर जि. पुणे) आणि प्रकाश गोरे (रा. झारकरवाडी ता. इंदापूर जि. पुणे) या ६ जणांविरोधात गुन्हा दाखल करण्यात आला आहे.