योगेश काशिद, साम टीव्ही

बीड : बीडमधील कळंब-अंबाजोगाई महामार्गावर आज भीषण अपघाताची घटना घडली आहे. सावळेश्वर आणि औरंगपूर शिवाराच्या सीमेवर आज बुधवारी दुपारी सुमारे तीन वाजण्याच्या दरम्यान भरधाव पिकअपने समोरून येणाऱ्या दुचाकीला जोराची धडक दिली. या अपघातात दुचाकीवरील दोन वीटभट्टी कामगार जागीच ठार झाले. सुभाष आश्रुबा मोहिते (वय ५०) आणि सुनिल भीमराव पवार (वय ४०, दोघेही रा बार्शी, ह.मु.सातेफळ, वीटभट्टी, अंबाजोगाई) अशी मृतांची नावे आहेत.

बार्शी येथील काही कामगार अंबाजोगाई तालुक्यातील सातेफळ येथील वीटभट्टीवर काम करतात. नातेवाईक आजारी असल्यामुळे येथील सुभाष आश्रुबा मोहिते आणि सुनिल भीमराव पवार हे दोन कामगार दुचाकीवरून क्रमांक एमएच २५ एबी ४१९८ बार्शीला गेले होते. बुधवारी दोघेही परत सातेफळकडे निघाले. यावेळी दुपारी तीन वाजेच्या दरम्यान सावळेश्वर आणि औरंगपूर शिवाराच्या सीमेवर त्यांच्या दुचाकीला समोरून येणाऱ्या भरधाव पिकअकने क्रमांक एमएच २० जीसी २१०८ जोराची धडक दिली. यात दुचाकीवरील दोन्ही कामगारांचा मृत्यू झाला.

घटनेची माहिती मिळताच सहाय्यक पोलीस निरीक्षक मच्छिन्द्रनाथ शेंडगे, पोलीस कर्मचारी सीताराम डोंगरे, गणेश राऊत, महादेव केदार, रामनाथ वारे यांनी अपघातस्थळाला भेट देऊन पंचनामा केला. दोघांचेही मृतदेह अंबाजोगाई येथील स्वाराती रुग्णालयात उत्तरीय तपासणीसाठी पाठविण्यात आले आहेत.

सांगलीत बाईक अन् डंपरचा भीषण अपघात

दरम्यान, सांगलीमध्ये देखील एक भीषण अपघाताची घटना घडली आहे. या अपघातात एकाच कुटुंबातील तीन जणांचा मृत्यू झाला आहे. वडिलांसह दोन मुलांचा यात मृत्यू झाला आहे, तर आई गंभीर जखमी आहे. इस्लामपूर-आष्टा रोडवर हा भीषण अपघात झाला आहे. अश्फाक पटेल (वय ३९), अशरफ पटेल (वय १२) आणि असद पटेल (वय १०) असं ठार झालेल्या बाप लेकांची नावे आहेत.