योगेश काशिद, बीड

बीडमध्ये १६ वर्षांच्या अल्पवयीन मुलीचं अपरहण करून तिचा विनयभंग करण्यात आल्याची धक्कादायक घटना समोर आली आहे. बीड जिल्ह्यातील नेकनूर पोलिस ठाण्याच्या हद्दीत ही घटना घडली. या शाळकरी मुलीचे तिघांनी अपरहण केले. तिला कारमध्ये जबरदस्ती बसवून नेलं आणि तिचा विनयभंग करण्यात आला. आरोपी ऐवढ्यावरच थांबले नाही तर त्यांनी या मुलीला प्लास्टिकच्या पाईपने मारहाण देखील केली. या घटनेमुळे बीडमध्ये खळबळ उडाली.

मिळालेल्या माहितीनुसार, पीडित मुलगी आपल्या घरात होती. त्याचवेळी आरोपी तिथे आले. त्यांनी तिला जबरदस्ती कारमध्ये बसवले आणि कारमध्येच तिचा विनयभंग केला. आरोपींनी पीडित मुलीला पाईपने जबरदस्त मारहाण देखील केली. तसंच घडलेला प्रकार कोणाला सांगितल्यास जीवे मारण्याची धमकी देखील दिली. त्यानंतर पीडित मुलीला सोडून देण्यात आले.

या घटनेनंतर पीडित मुलगी प्रचंड घाबरली. तिने आपल्या आई-वडिलांना याबाबत सांगितले. तर त्यांनी तिला घेऊन नेकनूर पोलिस ठाण्यात धाव घेत तक्रार दाखल केली. घटनेचे गांभीर्य लक्षात घेऊन पोलिसांनी तिन्ही आरोपींविरोधात गुन्हा दाखल केला. आरोपींविरोधात अपहरण, विनयभंग आणि मारहाण केल्याप्रकरणी गुन्हा दाखल करण्यात आला. सध्या तिन्ही आरोपी फरार असून पोलिस त्यांचा शोध घेत आहेत.

बीडमध्ये गुन्हेगारीच्या घटना दिवसेंदिवस वाढत चालल्या आहेत. गुन्हेगारांना पोलिसांचा धाक राहिला नसल्याचे चित्र वारंवार समोर येत आहे. कधी मारहाण, कधी कुणाचे अपरहण, कधी कुणाची हत्या, महिलेचा विनयभंग आणि बलात्कार यासारख्या घटना सतत समोर येत आहेत. संतोष देशमुख हत्याकांड प्रकरणानंतर बीडमध्ये सतत वेगवेगळ्या घटना समोर येत आहेत. नुकताच पोलिसाने एका महिलेला अमानुष मारहाण केल्याची घटना घडली. तर काही तरुणांनी दहशत माजवण्यासाठी एका तरुणाची बोटं छाटली होती. या सर्व घटनांमुळे बीडमध्ये खळबळ उडाली आहे.