Beed Crime : बीडमध्ये गुंडाराज! बैल शेतात गेला म्हणून शेतकरी महिलेला अमानुष मारहाण, जाब विचारणाऱ्या भावांनाही चोपलं; Video

योगेश काशिद, साम टीव्ही, प्रतिनिधी

Beed : बीडमध्ये दिवसेंदिवस गुन्हेगारी वाढत असल्याचे पाहायला मिळत आहे. दररोज हाणामारी, मारहाण असे प्रकार बीडमधून समोर येत आहेत. आता अशीच एक मारहाणीची घटना बीडच्या गोविंदवाडी येथे घडल्याचे उघडकीस आले आहे. बैल शेतात आल्याने एका शेतकरी महिलेचा अमानुष मारहाण करण्यात आली आहे.

मिळालेल्या माहितीनुसार, बीडच्या गेवराई तालुक्यातील गोविंदवाडी येथे हा प्रकार घडला आहे. शेतकरी महिलेचा बैल चरत असताना चुकून शेजाऱ्यांच्या शेतामध्ये गेला. बैल शेतात आल्याचा शेजाऱ्यांना भयंकर राग आला. या रागात चार ते पाच जणांनी शेतकरी महिलेला अमानुष मारहाण केली. शुल्लक कारणामुळे महिलेला झालेल्या मारहाणीमुळे संताप व्यक्त केला जात आहे.

बीडमधील या घटनेमुळे माणुसकीला काळीमा फासल्याचे म्हटले जात आहे. बैल शेतात आला म्हणून एका महिलेला मारहाण करण्यात आली. बहिणीला मारहाण का केली असा जाब विचारणाऱ्या पीडितेच्या दोन्ही भावांवर देखील हल्ला करण्यात आला. हल्ल्यामुळे दोन्ही भाऊ गंभीर जखमी असून त्यांच्यावर बीडच्या शासकीय रुग्णालयात उपचार सुरु आहेत.

बीडमधील एक व्हिडीओ सोशल मीडियावर प्रचंड व्हायरल होत आहे. या व्हिडीओमध्ये काहीजण एका महिलेला मारहाण करत असल्याचे पाहायला मिळते. महिलेचा बैल चरताना शेतात गेल्याने तिला अमानुषपणे मारहाण करण्यात आली. याचा जाब विचारण्यासाठी गेलेल्या तिच्या भावांनाही मार देण्यात आला. या प्रकरणी गेवराई पोलीस अधिक तपास करत आहेत.