बीडमध्ये गुन्हेगारांच्या घटनांमध्ये वाढ होत असल्याचं चित्र आहे. अशातच बीडमधून एक धक्कादायक बातमी समोर येत आहे. पवनचक्की कंपनीकडून मावेजा (भरपाई) मागणाऱ्या शेतकऱ्याला पोलिसांनी धमकी दिली असल्याचा आरोप करण्यात आला आहे. 'तुझे कॅरेक्टर खराब करून टाकेन बेट्या', अशा शब्दांत पोलिसांनी शेतकऱ्याला धमकी दिली असल्याचं व्हिडिओतून समोर आलंय. या घटनेनंतर बीडमधील वातावरण पुन्हा एकदा चिघळलं असल्याचं बोललं जात आहे.

मिळालेल्या माहितीनुसार, ओ२ Renewable या पवनचक्की कंपनीचा वीजपुरवठा करणारा टॉवर आणि विद्युत तारा शेतकरी गणेश झोडगे आणि कृष्ण कुडके यांच्या शेतातून जात असल्याची माहिती आहे. कंपनीकडून योग्य मावेजा न मिळाल्यानं शेतकऱ्यांनी काम थांबवण्याचा निर्णय घेतला होता. काही दिवसांपूर्वीच त्यांनी यासंदर्भात निर्णय घेतला होता.

काम थांबवण्याचा निर्णय घेतल्यानंतर पोलीस त्या ठिकाणी पोहोचले. नेकनूर पोलीस स्टेशनचे ३ अधिकारी, दत्ता बळवंत, सचिन मुरूमकर आणि सचिन गर्जे तिन्ही पोलीस घटनास्थळी दाखल झाले. यावेळी दत्ता बळवंत संतप्त झाले. त्यांनी शेतकऱ्यांना धमकी दिली. 'तुझे कॅरेक्टर खराब करून टाकेन बेट्या', अशी शब्दांत त्यांनी धमकी दिल्याचा आरोप आहे.

या घटनेचा व्हिडिओ समाजमाध्यमांमध्ये प्रचंड प्रमाणात व्हायरल झाला. व्हिडिओ पाहिल्यानंतर स्थानिकांमध्ये संतापाची लाट उसळली. त्यांनी या घटनेचा विरोध दर्शवला. दरम्यान, या घटनेबाबत पोलीस दत्ता बळवंत यांच्यासोबत संपर्क साधण्यात आला. त्यांनी स्पष्टीकरण दिलं की, 'तो व्हिडिओ आमचाच आहे. शेतकरी टॉवरचे नट - बोल्ट काढत होते. आम्ही त्यांना कायदेशीर मार्गानं मावेजा मिळवण्यास सांगत होतो. पण शेतकरी ऐकत नव्हते', असं पोलीस म्हणाले.

हे प्रकरण समोर येताच तपासाला सुरूवात करण्यात आली आहे. पोलिसांच्या वागणुकीबद्दल शेतकऱ्यांनी तीव्र नाराजी व्यक्त केली आहे.