मस्साजोगचे संतोष देशमुख हत्या, वाल्मिक कराड खंडणी प्रकरण आणि दोन सख्ख्या भावांची हत्या या भयंकर घटनांनंतर बीड पुन्हा हादरलं आहे. बीडच्या अंबाजोगाईमध्ये गोळीबाराची घटना घडली आहे. प्रेयसीनं बोलणं बंद केलं म्हणून तिच्या कथित प्रियकरानं घराच्या खिडकीतून गोळीबार केला. ही धक्कादायक घटना शुक्रवारी घडली. या घटनेनं बीड पुन्हा चर्चेत आलं आहे.

बीड क्राइमचं हॉटस्पॉट झालं आहे. मस्साजोगचे सरपंच संतोष देशमुख हत्येनं तर गुन्हेगारीचा कळसच गाठला. त्यात गेल्या काही दिवसांपासूनच्या घटनांमुळं दहशतीनं बीडमध्ये ठाण मांडल्याचं चित्र आहे. आता अंबाजोगाई तालुकाही या गडद छायेखाली वावरतोय. बीडच्या अंबाजोगाई तालुक्यात दहशत पसरलीय. अंबाजोगाईत दिवसाढवळ्या गोळीबाराचा प्रकार घडला असून, या प्रकरणामुळे बीड पुन्हा हादरले आहे.

मिळालेल्या माहितीनुसार, गणेश चव्हाण या तरुणाचे एका तरूणीशी प्रेमसंबंध होते. मात्र, काही दिवसांपासून ती गणेशला टाळत होती. गणेश चव्हाणच्या त्रासाला कंटाळून तिने त्याच्यासोबत बोलणेही बंद केले होते.

प्रेयसीनं बोलणं बंद केल्यामुळे गणेशला संताप अनावर झाला. त्याने तरूणीला आणि तिच्या कुटुंबीयांना जीवे मारण्याची धमकी दिली. नंतर रागाच्या भरात गणेश थेट अंबाजोगाईमध्ये आला. तरूणीच्या घरी जाऊन दरवाजा ठोठावला. मात्र, दरवाजा कुणीच उघडला नाही. रागाच्या भरात त्याने खिडकीतून देशी बनावटीच्या पिस्तुलने गोळीबार केला.

गोळीबार केल्यानंतर परिसरात भीतीचे वातावरण निर्माण झाले. सुदैवाने कुटुंबातील इतर मंडळी दुसर्‍या खोलीत असल्यामुळे कोणताही अनुचित प्रकार घडला नाही. या प्रकरणाची माहिती मिळाल्यानंतर पोलिसांनी तातडीने धाव घेत घटनास्थळाची पाहणी केली. नंतर आरोपीला शोधण्यासाठी पोलीस पथक गणेशच्या शोधात निघाली. तपास करीत पोलिसांनी गणेश चव्हाणला अटक केली आहे. या प्रकरणानंतर बीड मात्र पुन्हा हादरले. या आणि अशा अनेक घटनांमुळं आजूबाजूच्या गावांमध्येही दहशत माजली आहे.