मराठ्यांना कुणबी दाखले देण्यासाठी राज्य सरकारने हैदराबाद गॅझेटियर लागू करण्याचा निर्णय घेतल्यानंतर आता बंजारा समाजानंही याच गॅझेटीयरनुसार एल्गार पुकारला.. मात्र या आंदोलनातल्या भाषणात धनंजय मुंडेंनी बंजारा-वंजारा एकच असल्याचं केलेल्या वक्तव्यावरून वाद निर्माण झालाय. बंजारा समाजातील नेत्यांनी मुंडेंविरोधात आक्रमक भूमिका घेतलीय.. तर दोन्ही समाज पूर्णपणे वेगळे असल्याचं बंजारा अभ्यासकांचं म्हणणंय.

वंजारा आणि बंजारा समाजात काय फरक आहे पाहूयात...

वंजारी समाज भगवान बाबांना मानतो तर बंजारा समाज संत सेवालाल महाराजांना. भगवानगड वंजारी समाजाचं शक्तीपीठ तर पोहरादेवी बंजारा समाजाचं शक्तीपीठ आहे. वंजारी समाज ग्रामीण मराठीच बोलतो तर बंजारा समाज गोरमाटी ही भाषा बोलतो. वंजारी महिला सामान्य गृहिणीसारखीच राहते. तर बंजारा महिलांची वेशभूषा विशिष्ट प्रकरची असते. वंजारी समाजात ऊसतोड कामगारांची संख्या अधिक...तर बंजारा समाजातील बहुतांश लोक बांधकाम साईट्सवर काम करताना दिसतात.

दरम्यान हैदराबाद गॅझेटमधील माहिती देत आरक्षणाचे अभ्यासक बाळासाहेब सराटेंनी बंजारा - वंजारा एकच नसल्याचा दावा केलाय. तर बंजारा समाजाकडून तीव्र विरोध होत असल्यामुळे आता धनंजय मुंडेंनी सारवासारव करत दोन्ही समाज भटके असल्यामुळे आपण विधान केल्याचं त्यांनी स्पष्ट केलंय. 'माझ्या विधानाचा विपर्यास' असं आमदार धनंजय मुंडे यांनी म्हटलं.

आता मुंडेंनी यू टर्न घेतला असला तरी बंजारा आणि वंजारा एकच असल्याचं विधान करण्य़ामागे नेमका मुंडेंचा काय हेतू होता? ओबीसी आरक्षणातले वाटेकरी वाढत चालल्यामुळे धनगरानंतर बंजारा आणि आता वंजारींनाही एसटीत आरक्षण हवंय का? असे काही प्रश्न यानिमित्तानं उपस्थित होत आहेत.