नाशिकमधील भोंदूबाबा अशोक खरात प्रकरण बाहेर आल्यानंतर राजकीय वर्तुळातील अनेकांचे धाबे दणाणले आहेत. अशोक खरात हा राज्यातील अनेक बड्या राजकीय नेत्यांचा अध्यात्मिक मार्गदर्शक होता. त्यापैकी एक रुपाली चाकणकर या सुद्धा होत्या. चाकणकर यांचे अशोक खरातशी जवळचे संबंध असल्याने त्यांना महिला आयोगाच्या अध्यक्षपदाचा राजीनामा द्यावा लागला होता. आता रुपाली चाकणकर यांना आणखी एक झटका बसण्याची शक्यता आहे.

खरात प्रकरणामुळे चाकणकर यांची राष्ट्रवादी काँग्रेसच्या महिला प्रदेशाध्यक्षपदावरूनही उचलबांगडी होण्याची शक्यता आहे. दरम्यान मुख्यमंत्री फडणवीस आज विधानसभेत अशोक खरात प्रकरणावर निवेदन देणार आहेत. त्याआधी सुनेत्रा पवार यांनी अचानक देवेंद्र फडणवीसांची भेट घेतली. या भेटीचे कारण आहे, याचा तपशील अद्याप समोर आला नाहीये. या बैठकीत अशोक खरात प्रकरणाबाबत चर्चा झाल्याची शक्यता आहे.

दरम्यान दिवसांपूर्वीच रुपाली चाकणकरांनी सुनेत्रा पवार यांची भेट घेत महिला आयोगाच्या अध्यक्षपदाचा राजीनामा दिला होता. त्यानंतर देवगिरी बंगल्यावर सुनेत्रा पवार, सुनील तटकरे आणि प्रफुल्ल पटेल यांची बैठक झाली होती. या बैठकीत रुपाली चाकणकर यांच्या अशोक खरातशी असलेल्या संबंधांमुळे राष्ट्रवादी काँग्रेस पक्षाची होणारी बदनामी कशी थांबवायची, याबाबत तिन्ही नेत्यांची चर्चा झाली होती.

या बैठकीतून रुपाली चाकणकर यांना राष्ट्रवादी काँग्रेसच्या महिला प्रदेशाध्यक्षपदाचा राजीनामा देण्याची सूचना दिल्याचीही कुजबुज राजकीय वर्तुळात होती. या बैठकीनंतर सुनील तटकरे यांनी, 'कोणालाही पाठीशी घातले जाणार नसल्याचं वक्तव्य केलं होतं. तेव्हापासूनच रुपाली चाकणकर यांनी राष्ट्रवादीच्या महिला प्रदेशाध्यक्षपदावरुन उचलबांगडी होईल, अशी चर्चा रंगलीय.