अमर घटारे  
अमरावती : राज्यात कुणाचेही सरकार स्थापन करण्याची क्षमता कोणामध्ये नाही. आमच्या शिवाय कोणाचेही सरकार स्थापन होणार नाही. वेळ आली तर अपक्ष आणि लहान पक्ष मिळून मोट बांधणी केली; तर मोठे पक्ष बाजूला हटून लहान पक्ष सत्तेत येईल; असा विश्वास प्रहार संघटनेचे प्रमुख आमदार बच्चू कडू यांनी व्यक्त केला आहे. 

विधानसभा निवडणुकीसाठी (Vidhan Sabha Election) मतदानाची प्रक्रिया पार पडली आहे. आता २३ नोव्हेंबरला निकाल लागून राज्यात सत्तेत कोण बसणार याचे चित्र स्पष्ट होणार आहे. शिवाय मतदानानंतर आलेल्या एक्झिट पोल नुसार महायुतीला जास्त जागा दिसत आहेत. यावर बोलताना बच्चू कडू (Bachchu Kadu) यांनी आपली प्रतिक्रिया व्यक्त केली. त्यांनी सांगितले, कि एक्झिट पोल हा अंदाज असून निकालाच्या दिवशी समजेल कोण सत्तेत असेल. मात्र सरकार स्थापन करण्याची ताकद कोनात नसल्याचे ते म्हणाले. 

तर लहान पक्षाचा मुख्यमंत्री 

राज्यात प्रहार संघटना व मित्र पक्ष असलेल्या महाशक्तीच्या १५ ते २० जागा निवडून येतील. यामुळे आम्ही कोणाला पाठिंबा देणार नाही, तर आम्ही मोठ्या पक्षाचा पाठिंबा घेऊ. मोठ्या पक्षाचे सरकार बनवण्यापेक्षा अपक्ष आणि लहान पक्षाचे सरकार बनू शकते. त्यासाठी पाठिंबा कोणाचा घ्यायचा ते आम्ही ठरवू. अर्थात वेळ पडल्यास लहान पक्षाचा मुख्यमंत्री होईल; असा विश्वास देखील त्यांनी व्यक्त केला.