अमरावती शहर मध्यरात्री झालेल्या गोळीबार झाल्याची घटना घडलीय. एका निलंबित तलाठ्याच्या घराबाहेर गोळीबार करण्यात आल्याने शहरात खळबळ उडाली आहे. अमरावतीच्या अर्जुन नगर भागात राहणाऱ्या विपुल ठाकरे यांच्या घराबाहेर अज्ञात व्यक्तींनी दोन गोळ्या झाडल्या. दरम्यान गोळीबाराची माहिती मिळताच पोलीस आयुक्त राकेश ओला यांच्यासह पोलीस ताफा घटनास्थळी दाखल झाला. दरम्यान गोळीबार करणारे आरोपी फरार असून पोलीस त्यांचा शोध घेत आहेत.

नेमकी घटना काय?

अज्ञात हल्लेखोर रविवारी रात्री विपुल ठाकरे यांच्या अर्जून नगर परिसरातील घरासमोर आले. त्यांनी प्रवेशद्वाराजवळ आल्यानंतर गोळीबार केला. घराच्या दिशेने दोन गोळ्या झाडल्या. प्राथमिक तपासात या गोळ्या घराच्या भिंतीला लागल्याचे निदर्शनास आले. ही घटना घडली, तेव्हा ठाकरे यांच्या कुटुंबातील सदस्य हे घराच्या आत होते. त्यामुळे कुणालाही दुखापत झाली नाही. हल्लेखोर लगेच पळून गेले.

या घटनेची माहिती मिळताच वरिष्ठ पोलीस अधिकारी आणि गाडगेनगर पोलिसांचे पथक घटनास्थळी पोहचले. त्यानंतर पोलिसांनी पंचनामा करून तपास सुरू केला आहे. घटनेची माहिती मिळताच पोलीस उपायुक्त यशवंत सोळंके आणि श्याम घुगे, सहायक पोलीस आयुक्त निलेश ब्राम्हणे, गाडगेनगर पोलीस ठाण्याचे वरिष्ठ पोलीस निरीक्षक गोरखनाथ जाधव, गुन्हे शाखेचे प्रमुख दिनेश दहातोंडे, अतुल वर हे तत्काळ पथकासह घटनास्थळी पोहचलेत.

गोळीबार कशासाठी केला?

विपुल ठाकरे यांच्या घराबाहेर अज्ञात हल्लेखोरांनी गोळीबार कशासाठी केला, याचा तपास केला जातोय. विपुल ठाकरेंना धाक दाखवण्यासाठी हे कृत्य करण्यात आले की त्यांना जिवे मारण्याचा कट होता, हे अद्याप स्पष्ट झालेले नाहीये. पोलीस दप्तरी विपुल ठाकरे याची फरार म्हणून नोंद आहे. विपुल ठाकरे यांच्या विरोधात अत्याचाराचा गंभीर गुन्हा दाखल आहे. पिस्तुलाचा धाक दाखवून अत्याचार केल्याचा आणि पैसे उकळल्याचा आरोप एका महिलेने केलाय. या प्रकरणी विपुल ठाकरे यांना निलंबित करण्यात आले आहे.