अक्षय गवळी 

अकोला : सातत्याने पाऊस पडत असून अकोला जिल्ह्याला देखील पावसाने जोरदार तडाखा दिला आहे. यानंतर अकोला जिल्ह्यात पुढील पाच दिवस पून्हा एकदा जोरदार पावसाचा इशारा देण्यात आला. अकोला शहरासह ग्रामीण भागात अर्थात जिल्ह्याभरात आजपासून २८ सप्टेंबरपर्यंत पावसाची शक्यता वर्तवण्यात आली असून सतर्क राहण्याचे आवाहन प्रशासनाकडून करण्यात आले आहे.

राज्यात जोरदार पावसाचा तडाखा बसत असून जनजीवन विस्कळीत झाले आहे. शिवाय अनेक भागात पूरस्थिती देखील निर्माण झाली आहे. अकोला जिल्ह्याला देखील मागील आठवड्यात जोरदार पावसाने तडाखा दिला आहे. काही दिवसांपासून पाऊस कमी झाला असता तरी पुन्हा एकदा नागपूरच्या प्रादेशिक हवामान केंद्राकडून अकोला जिल्ह्यात जोरदार पावसाचा अंदाज वर्तविण्यात आला आहे.  

प्रशासनाचे आवाहन 

मागील पावसामुळे नदी, नाले व तलाव यामध्ये जलसाठा जमा झाला आहे. यामुळे आगामी दिवसात जोरदार पाऊस झाल्यास पूरस्थिती निर्माण होण्याची शक्यता नाकारता येत नाही. यामुळे अनावश्यकपणे पाण्यात जाण्याचे धाडस करू नये. तसेच नदी, अज्ञात किंवा खोल पाण्यात जाऊ नका. विजेच्या तारा आणि गटारींपासून दूर राहा. पूरग्रस्त भागातून वाहन नेऊ नका. कारण पुराच्या पाण्यामुळे रस्त्यांचा अंदाज येत नाही. नदीकाठाजवळील गावातील ग्रामस्थांना सतर्कतेची सुचना देण्यात आले आहे, असे आवाहन जिल्हा प्रशासनाने केले आहे.

जळगाव जिल्ह्यात तीन दिवस पाऊस 

जळगाव जिल्ह्यातील काही भागात जोरदार पावसाने तडाखा दिला आहे. तीन तालुक्यात ढगफुटी सदृश्य पाऊस झाला असून येथील जनजीवन पूर्वपदावर येत असून जिल्ह्यात पुन्हा एकदा जोरदार पावसाचा इशारा देण्यात आला आहे. पुढील तीन दिवस जिल्ह्यात मुसळधार पावसाची शक्यता हवामान विभागाकडून वर्तविण्यात आली आहे.