अक्षय गवळी, साम टीव्ही, प्रतिनिधी

Ganesh Visarjan Akola : अकोल्यामधून एक धक्कादायक बातमी समोर आली आहे. गणेश विसर्जन मिरवणुकीदरम्यान बंदोबस्तावर असणाऱ्या पोलीस दलातील एका होमगार्डला काही तरुणांनी मारहाण केल्याचा प्रकार अकोल्यात घडला आहे. या घटनेनंतर होमगार्ड दलाच्या २० ते २५ जवानांनी अधीक्षकांची भेट घेत कारवाई करण्याची मागणी केली आहे.

मिळालेल्या माहितीनुसार, अकोल्यातील बोरगाव मंजू गावामध्ये गणेश विसर्जन मिरवणुक सुरु असताना बंदोबस्तावर तैनात असलेल्या पोलीस दलाच्या होमगार्डला तरुणांनी मारहाण केली. एका गणेश मंडळातील तीन ते चार तरुणांनी कॉलर पकडून मिरवणुकीत नेत मारहाण केल्याचा आरोप होमगार्ड जवानाने केला आहे.

गणरायाच्या विसर्जन मिरवणुकीदरम्यान ड्युटीवर असताना भाराबाई गणेश उत्सव मंडळातील तीन तरुणांनी मला कॉलर पकडून मिरवणुकीत नेले आणि त्यांनी मला मारहाण केली असा आरोप होमगार्ड दीपक सयाम यांनी केला आहे. आपल्याला कोणतेही कारण नसताना मारहाण झाल्याचेही होमगार्ड जवान दीपक सयाम यांनी म्हटले आहे.

मारहाण प्रकरण झाल्यानंतर दिपक सयाम यांनी बोरगाव मंजू पोलीस ठाण्यामध्ये तक्रार दिला. तक्रार दाखल करत असताना संबंधित ठाण्यातील पोलीस ठाणेदाराने गुन्हा दाखल करण्यास टाळाटाळ केली असा आरोप दीपक सयाम यांनी केला आहे. यानंतर २० ते २५ होमगार्ड दलातील जवानांनी पोलीस अधीक्षकांची भेट घेतली आणि संबंधितांवर कठोर कारवाई करण्याची मागणी केली.