Maharashtra Politics : महायुतीत पालकमंत्रिपदाचा वाद अजूनही मिटायला तयार नाही. रायगडच्या पालकमंत्रिपदाचा तिढा कायम असताना अजित पवारांनी रायगडच्या डीपीडीसीची बैठक घेतली. या बैठकीला राष्ट्रवादीच्या मंत्री आदिती तटकरे उपस्थित होत्या.

मात्र शिंदे गटाचा कोणताही आमदार या बैठकीला नव्हता. बैठकीचं निमंत्रणच नसल्यामुळे उपस्थित नसल्याचा आरोप शिंदे गटाचे आमदार महेंद्र दळवी आणि महेंद्र थोरवेंनी केलाय. त्यामुळे हा वाद आणखीनच चिखळलाय. तर आपल्याला निमंत्रण होतं मात्र पूर्वनियोजित कामामुळे बैठकीला हजर नसल्याचं शिंदे गटाच्याच भरत गोगावलेंनी सांगितलंय.

उपमुख्यमंत्री अजित पवार यांच्या दालनात रायगड जिल्हा वार्षिक नियोजनाची बैठक पार पडली. बैठकीला तिनही आमदार गैरहजर असल्याने पालकमंत्री पदावरून पुन्हा तिढा निर्माण झाला आहे का अशी चर्चा आहे. त्यामुळे शिंदेंच्या मंत्र्यांची कोंडी केली जातेय का पाहूया...

शिंदेंच्या मंत्र्यांची कोंडी?

- एसटी बस भाडेतत्वावर घेण्याची निविदा रद्द

- एसटी महामंडळ अध्यक्षपदी प्रशासकीय नियुक्ती करुन सरनाईकांना झटका

- उद्योग खात्यात मंत्र्यांना बायपास करुन अधिकाऱ्यांचे परस्पर निर्णय

- डीपीडीसी बैठकीत जिल्ह्यातील आमदारांना निमंत्रण नाही?

तर पालकमंत्रिपदावरून वाद अजूनही कायम असल्याचं मान्य करत अजितदादांनी घेतलेल्या बैठकीवर मात्र उपमुख्यमंत्री एकनाथ शिंदेंनी सारवासारव केलीय.

रायगडच्या पालकमंत्रिपदावरून वाद शिगेला असताना अजित पवारांनी डीपीडीसीची बैठक घेतली. मात्र या बैठकीला शिंदे गटाच्या आमदारांना निमंत्रण न दिल्यामुळे या वादात आणखीन तेल ओतलं गेलं. तर दुसरीकडे भरत गोगावलेंना निमंत्रण दिले.

रायगड जिल्ह्याच्या पालकमंत्रीपदावरून शिवसेना आणि राष्ट्रवादीत जुंपली आहे. शिवसेना कार्यकर्त्यांनी रस्त्यावर उतरत आंदोलनंही केली. शिवसेनेचे जिल्ह्यातील तिन्ही आमदार तटकरे यांच्या विरोधात आक्रमक झाले.अद्याप महायुतीचे तिन्ही प्रमुख नेत्यांनी या वादावर तोडगा काढलेला नाही.अशातच ही बैठक पार पडल्याने पुन्हा आणखी वाद वाढण्याची शक्यता आहे. त्यामुळे आगामी काळात हा वाद वाढणार की यावर अजितदादा आणि शिंदे तोडगा काढून महायुतीतील वाद मिटवणार हेच पाहायचं.