सचिन बनसोडे 

श्रीरामपुर (अहमदनगर) : अवैध मुरूम वाहतूक करणारा डम्पर पकडण्यात आला असता त्याची तहसील कार्यालयातून चोरी झाली होती. या प्रकरणी गुन्ह्यात नाव येऊ न देण्यासाठी २० हजाराची लाचेची मागणी करण्यात आली होती. यात १२ हजाराची रक्कम स्वीकारताना पोलीस  हेडकॉन्स्टेबल रघुनाथ खेडकर यांना रंगेहाथ पकडण्यात आले. 

रेती व मुरूम वाहतूक (Ahmednagar) करण्यास मनाई आहे. मात्र छुप्या पद्धतीने अवैधपणे वाहतूक सुरूच आहे. अशांवर पोलीस प्रशासन व महसूल विभागाकडून कारवाई करण्यात येत असते. अशाच प्रकारे (Shrirampur) श्रीरामपूर तहसील कार्यालयाकडून अवैध मुरूम वाहतूक करत असताना डंपर पकडण्यात आले होते. हे डंपर तहसील कार्यालयाच्या आवारात लावण्यात आले होते. मात्र हे डंपर चोरी गेल्याचा प्रकार घडला होता. दरम्यान या प्रकरणातील गुन्ह्यात नाव न येऊ देण्यासाठी पोलीस हेडकॉन्स्टेबल रघुनाथ खेडकर यांनी २० हजाराची मागणी केली होती. 

दरम्यान तक्रारदाराने याबाबत लाचलुचपत विभागाकडे तक्रार दाखल करण्यात आली होती. त्यानुसार एसीबीने (ACB) सापळा रचला होता. मात्र खेडकर यांच्या सांगण्यावरून चहावाल्याने १२ हजार रुपयांच्या लाचेची रक्कम स्वीकारली. याचवेळी एसीबीने चहावाल्याला ताब्यात घेतले. यानंतर सदरची रक्कम खेडकर यांच्या सांगण्यावरून स्वीकारल्याची माहिती समोर आली. त्यानुसार (Bribe) खेडकर आणि खाजगी इसम श्रीवास्तव यांचे विरोधात श्रीरामपूर शहर पोलीस ठाण्यात गुन्हा दाखल करण्यात आला आहे.