जळगाव : आगामी विधानसभा निवडणुकीची चर्चा राजकीय पक्षांच्या नेत्यांमध्ये रंगू लागली आहे. राजकीय नेत्यांकडून विविध जागांवरही दावे केले जात आहे. जळगावमधील रावेर लोकसभा मतदारसंघातील जामनेर विधानसभा मतदारसंघही जोरदार चर्चेत आहे. जामनेरमधील या जागेवर भाजपने तब्बल पाच वेळा विजयी झेंडा रोवला आहे. सध्या मंत्री गिरीश महाजन या मतदारसंघाचं विधीमंडळात प्रतिनिधित्व करतात.

जामनेर विधानसभा मतदारसंघातील ७५ टक्के भाग हा ग्रामीण भागात मोडतो. मागील निवडणुकीच्या माहितीनुसार, मतदारसंघातील एकूण २,७८,३५६ मतदार आहेत. तर एकूण ३,४९,९५७ लोकसंख्या मतदारसंघात आहे.

काय आहे जामनेर विधानसभा मतदारसंघाचा इतिहास?

२०१९ साली झालेल्या विधानसभा निवडणुकीत भाजप नेते गिरीश महाजन हे १,१४,७१४ मते मिळवून विजयी झाले. गिरीश महाजन यांनी ३५,०१४ मतांच्या फरकाने राष्ट्रवादी काँग्रेसचे संजय गरुड यांचा पराभव केला.

2014 साली झालेल्या विधानसभा निवडणुकीत गिरीश महाजन यांनी ३५,७६८ मतांनी राष्ट्रवादी काँग्रेसचे केशव दिंगबर पाटील यांचा पराभव केला. २०१४ साली झालेल्या निवडणुकीत गिरीश महाजन यांनी १,०३,४९८ मते मिळवली होती. तर केशव पाटील यांना ६७,७३० मते मिळाली होती. मागील दोन दशके या विधानसभा मतदारसंघात भाजपची सत्ता आहे.

९६२ सालांपासून या विधानसभा मतदारसंघात ५ वेळा भाजपने बाजी मारली आहे. तर ४ वेळा काँग्रेस जिंकली आहे. तर दोन वेळा अपक्ष उमेदवार जिंकला आहे.

यंदा कोणाला संधी मिळणार?

दरम्यान, आगामी विधानसभा निवडणूक ऑक्टोबर महिन्यात होण्याची शक्यता आहे. त्यात जळगावच्या जामनेरमध्ये पुन्हा मंत्री गिरीश महाजन यांना भाजपकडून तिकीट मिळणार का, याकडे साऱ्यांचे लक्ष आहे. तसेच भाजपच्या बालेकिल्यात महाविकास आघाडीकडून कोणता पक्ष उमेदवार उभा करणार याकडेही साऱ्यांचं लक्ष असणार आहे.