जालना लोकसभा मतदारसंघातील पळशी येथे आज भाजप कार्यकर्ते आणि मराठा आंदोलक आमनेसामने आल्याने चांगलाच वाद झाला. घोषणाबाजी सोबत काही वेळ झटापटही झाली. मराठा आंदोलकांची रावसाहेब दानवे यांच्याशी भाजपच्या स्थानिक पदाधिकारी आणि कार्यकर्त्यांनी भेट होऊ दिली नाही यावरून चांगलाच राडा झाला. त्यामुळे जालन्यातील पळशीत काहीकाळ तणावाचं वातावरण निर्माण झालं होतं.

रावसाहेब दानवे यांचा दौरा पळशी येथे असताना मराठा आंदोलक त्यांची भेट घेऊन मराठा आरक्षणासाठी वीस वर्षात काय केलं? असा प्रश्न उपस्थित करणार होते. मात्र भाजपच्या स्थानिक पदाधिकाऱ्यांनी आणि कार्यकर्त्यांनी मराठा कार्यकर्त्यांना रावसाहेब दानवे यांची भेट घेऊ दिली नाही. रावसाहेब दानवे यांची सभा झाल्यानंतर ते निघून गेले.

मात्र स्थानिक भाजप कार्यकर्त्यांनी मराठा कार्यकर्त्यांना अडवले. भेट होऊ दिली नाही. त्यामुळे मराठा कार्यकर्ते आणि रावसाहेब दानवे हे समोरासमोर आलेच नाहीत. त्यामुळे संतापलेल्या मराठा आंदोलक आणि भाजप कार्यकर्ते नेते यांच्यात चांगलीच हमरीतुमरी झाली. पळशीमध्ये काही काळ तणावाचं वातावरण होते. पोलिसांनी हस्तक्षेप करत जमावाला पांगवलं.