2024 च्या लोकसभेच्या निवडणुकीत उमेदवारांचा सेम टू सेम पॅटर्न चर्चेत आलाय. रायगडमध्ये अनंत गीते आणि सुनील तटकरे यांच्या नावाचे डमी उमेदवार उतरलेत. हातकणंगले मतदारसंघातही तशीच परिस्थिती आहे. राजकारणातला सेम टू सेम पॅटर्न नेमका काय आहे आणि या पॅटर्नमुळे कुणाला फटका बसणार आहे पाहुयात या रिपोर्टमधून.

आता तुम्ही म्हणाल नेमकं यांना सांगायचंय तरी काय पण अशीच काहीशी स्थिती महाराष्ट्राच्या राजकारणात निर्माण झालीय. आता निवडणूक म्हटलं की प्रचार आला. सभा आल्या, आरोप प्रत्यारोप आले. एवढच काय तर आपल्य़ा उमेदवाराला जिंकवण्यासाठी समोरच्यांची मतं फोडली जातात, अगदीच वेळतर समोरची माणसंही फोडली जातात. मात्र हातकणंगले आणि रायगडमध्ये वेगळीच शक्कल लढवण्यात आलीय. विरोधी उमेदवाराची मतं फोडण्यासाठी सेम टू सेम नावाचे उमेदवार उभे करण्यात आलेत.

रायगडमध्ये 'सेम टू सेम'

रायगडमध्ये अजित पवार गटाचे सुनील तटकरे आणि ठाकरे गटाचे अनंत गीते निवडणुकीच्या रिंगणात आहेत. मात्र निव़डणुकीच्या रिंगणात आता तीन अनंत गीते आणि दोन सुनील तटकरे यांच्यात लढत होणार आहे. ठाकरे गटाच्या अनंत गीतेंविरोधात अनंत पद्मा गीते आणि अनंत बाळोजी गीते असे नाम साधर्म्य असलेले दोन उमेदवार आहेत. तर अजित पवार गटाच्या सुनील दत्तात्रय तटकरे यांच्याविरोधात सुनील तटकरी नावाचे उमेदवार उभे राहिलेत.

हीच परिस्थिती हातकणंगले लोकसभा मतदारसंघातही निर्माण झालीय. शिंदे गटाच्या धैर्यशील माने आणि ठाकरे गटाचे उमेदवारी सत्यजित पाटील यांच्याशी नामसाधर्म्य असलेले उमेदवार शोधून निवडणुकीच्या रिंगणात उतरवले आहेत..

सेम टू सेम.. राजू शेट्टी

2019च्या निवडणुकीतही राजू शेट्टींना अशाच डमी उमेदवाराचा फटका बसला होता. बहुजन महापार्टीने राजू शेट्टी नाव असलेल्या उमेदवाराला निवडणुकीत उतरवलं होतं. डमी राजू शेट्टीने स्वाभिमानीच्या राजू शेट्टींची तब्बल 8 हजार मतं खाल्ली होती. आता पुन्हा एकदा राजू शेट्टी हातकणंगले लोकसभेच्या रिंगणात उतरलेत. त्यामुळे धैर्यशील माने, सत्यजित पाटील यांच्यासारखंच राजू शेट्टींचाही डमी उमेदवार पुन्हा मैदानात उतरण्याची शक्यता आहे. रायगड आणि हातकणंगलेच्या निवडणुकीत 'सेम टू सेम'वाला पॅटर्न कुणाच्या मतांचं गणित बिघडवणार हे पाहणं मह्त्त्वाचं ठरेल.