वजन वाढवण्यासाठी लोक अनेक उपाय करत असतात. काही व्यायाम करतात, तर काही आहारामध्ये बदल करून स्नायूंच्या वाढीसाठी प्रयत्न करत असता. मात्र, वजन वाढवण्यासाठी दूध पिणे हा एक महत्त्वाचा पर्याय मानला जातो. लहान मुलांपासून मोठ्यांपर्यंत दूध वजन वाढवण्यासाठी प्यायला सांगितले जाते. पण प्रश्न असा आहे की गाईचे दूध प्यावे की म्हशीचे दूध? यावर तज्ज्ञांचे मत सविस्तर जाणून घेऊयात.

आहारतज्ज्ञांच्या मते, जर वजन वाढवायचे असेल तर म्हशीचे दूध हा अधिक चांगला पर्याय ठरतो. कारण म्हशीच्या दुधात गाईच्या दुधापेक्षा जास्त कॅलरीज, फॅट आणि प्रथिने असतात. गाईच्या दुधात चरबीचे प्रमाण साधारण तीन ते चार टक्के असते, तर म्हशीच्या दुधात ते सहा ते सात टक्क्यांपर्यंत असते. त्यामुळे वजन वाढवण्यासाठी आवश्यक असणाऱ्या जास्त कॅलरीज मिळवण्यात म्हशीचे दूध मदत करते. तसेच, म्हशीच्या दुधात प्रथिनांचे प्रमाणही गाईच्या दुधापेक्षा जास्त असते.

गाईच्या दुधात कॅलरीज आणि चरबी कमी असते, त्यामुळे ते वजन हळूहळू वाढवण्यासाठी मदत करते. पोटासाठी ते हलके असल्याने ज्यांना म्हशीचे दूध जड वाटते त्यांच्यासाठी गाईचे दूध अधिक योग्य आहे. मात्र म्हशीच्या दुधात कॅल्शियम, फॉस्फरस, मॅग्नेशियमसारखे खनिजे तसेच व्हिटॅमिन ए, डी आणि बी१२ अधिक प्रमाणात असतात.

यामुळे हाडे मजबूत होतात आणि शरीराला आवश्यक पोषक घटक मिळतात. मात्र, हे लक्षात ठेवणे महत्त्वाचे आहे की म्हशीचे दूध पचायला तुलनेने जड असते. त्यामुळे पचनाच्या तक्रारी असणाऱ्यांसाठी गाईचे दूध हा हलका आणि सहज पचणारा पर्याय मानला जातो. पण त्याच वेळी नियमित व्यायाम करणे आवश्यक आहे.