लहान मुलांची जेवणाच्या बाबतीत फार नाटकं असतात. त्यांना आवडीचे आणि चमचमीत पदार्थच खावे वाटतात. रोज पिझ्झा किंवा बर्गर तसेच बाहेरचे कुरकुरे आणि वेफर्स असे पदार्थ खाणे मुलांच्या आरोग्यासाठी घातक आहे. असे पदार्थ खाल्याने मुलांच्या आरोग्यावर याचा गंभीर परिणाम होतो. त्यामुळे मुलांना रोज हेल्दी आणि चमचमीत असं काय खाण्यासाठी द्यावं असा प्रश्न प्रत्येक आईच्या मनात फिरत असतो.

मुलांच्या जेवणाची आणि स्नॅक्सची हिच चिंता मिटवत आम्ही तुमच्यासाठी एक खास रेसिपी आणली आहे. ही रेसिपी अत्यंत सोपी आहे. यामध्ये तुम्हाला रात्रीच्या उरलेल्या शिळ्या जेवणापासून एक युनिक पदार्थ बनवण्याची रेसिपी आज आम्ही तुम्हाला सांगणार आहोत. चला तर मग लगेचच जाणून घेऊयात हेल्दी रेसिपी.

साहित्य

रात्रीचा भात - १ कप

बटाटे - २

हिरवी कोथिंबीर

मीठ

मिरची

बेकींग सोडा

कृती

सर्वात आधी एका मिक्सरमध्ये रात्रीचा उरलेला भात बारीक करून घ्या. भाताची छान थिक पेस्ट तयार करा. त्यानंतर यामध्ये दोन उकडलेले बटाटे मिक्स करा. बटाटे अगदी मऊवार उकडवून घ्यायचे आहेत. बटाटे मिक्स केल्यावर पुढे यात हिरवी कोथिंबीर मिक्स करा. तसेच मीठ आणि मिरची त्यासह थोडासा बेकींग सोडा मिक्स करा. हे सर्व मिश्रण एकजीव करून घ्या.

मिश्रण छान एकजीव झालं की ते १० मिनिटे तसेच झाकून ठेवा. तसेच पुढे एका कढईत तेल गरम करण्यासाठी ठेवा. तेल गरम झाल्यावर त्यात थोडे थोडे करून भज्यांप्रमाणे या पिठाचे गोळे तेलाच सोडा आणि छान गोल्डन ब्राउन रंग येईपर्यंत मस्त तळून घ्या. अशा पद्धतीने बनवलेली ही रेसिपी तुम्ही टोमॅटो केचपसह मुलांना खाण्यासाठी देऊ शकता.

लहान मुलांना ही रेसिपी फार आवडेल. तसेच मुलांना बाहेरील फास्ट फूड खाण्यापासून वाचवण्यासाठी तुम्ही ही डिश घरी हमखास बनवू शकता. या तुम्ही तुमच्या आवडीनुसार विविध भाज्या सुद्धा मिक्स करू शकता. त्यामुळे हा पदार्थ अगदी चविष्ट लागतो.