पावसाची चाहूल लागताच आपल्याला फिरण्याची आणि चटपटीत खाण्याची इच्छा होते. पावसाळ्यात बाहेरचे पदार्थ खाण्यापेक्षा तेच पदार्थ घरी सिंपल पद्धतीने बनवा. यामुळे आरोग्यही चांगले राहील आणि भूकही भागेल. ऑफिसमधून आल्यावर अवघ्या ५-१० मिनिटांत बनवता येतील अशा 'चाट' रेसिपी जाणून घेऊयात.

चना जोर गरम भेळ

साहित्य

• रोस्टेड चना

• बटाटा

• लाल तिखट

• हिरवी मिरची

• लिंबाचा रस

• कोथिंबीर

• चवीनुसार मीठ

• नमकीन शेव

कृती

चना जोर गरम भेळ बनवण्यासाठी सर्वप्रथम एका बाऊलमध्ये रोस्टेड चना, चिरलेला कांदा, टोमॅटो , हिरवी मिरची बारीक कापून घ्या. यात लिंबाचा रस, चवीनुसार मीठ आणि लाल तिखट टाका. सर्व मिश्रण छान एकजीव करा. शेवटी यात नमकीन शेव, बटाटा मॅश करून टाका. अवघ्या ५ मिनिटांत चटपटीत चना जोर गरम भेळ तयार झाली आहे. तुम्ही यात उकडलेले मक्याचे दाणे आणि रोस्टेड काजू देखील टाकू शकता.

चटपटीत भेळ

साहित्य

• चिंच

• खजूर

• गूळ

• कांदा

• टोमॅटो

• काकडी

• कच्ची कैरी

• मसाले- चाट मसाला, जिरं पावडर, काळ मीठ, लाल तिखट, कोथिंबीर

• फरसाण, बूंदी, शेव, चुरमुरे

• लिंबू

कृती

स्ट्रीट स्टाइल चटपटीत भेळ बनवण्यासाठी चिंच आणि खजूर १५ ते २० मिनिटे पाण्यामध्ये भिजवून मिक्सरला पेस्ट करून घ्या. त्यानंतर पॅनमध्ये गूळ, चाट मसाला, जिरं पावडर, काळ मीठ, लाल तिखट टाकून मिक्स करा. त्यानंतर या मिश्रणात चवीनुसार मीठ टाका. आता त्या भांड्यात चुरमुरे, फरसाण, बूंदी टाकून मिक्स करा. चांगले मिक्स झाल्यावर यात चिरलेला कांदा, टोमॅटो, काकडी, कच्ची कैरी आणि कोथिंबीर टाका. त्यानंतर तयार खजूर-चिंचची पेस्ट त्यात मिक्स करा. शेवटी वरून शेव टाकून लिंबाचा रस पिळा. अशाप्रकारे स्ट्रीट स्टाइल चटपटीत भेळ तयार झाली आहे.