मुंबई : भारतातून दक्षिण आफ्रिकेला जाऊ इच्छिणाऱ्यांसाठी महत्वाची माहिती समोर आली आहे. 'दक्षिण आफ्रिकेकडून इलेक्ट्रॉनिक ट्रॅव्हल ऑथोरायझेशन आणला जाणार आहे. यामुळे प्रवाशांना व्हिसासाठी थेट अर्ज करता येईल. याशिवाय ट्रस्टेड टूर ऑपरेटर स्कीम जानेवारी २०२५ मध्ये सुरू होणार आहे. त्यामुळे ग्रुप व्हिसा अर्ज सोपी होईल आणि प्रक्रिया कालावधी जलद होईल, अशी माहिती दक्षिण आफ्रिकेच्या पर्यटन मंत्री पॅट्रिशिया डे लिले यांनी दिली.

दक्षिण आफ्रिकेच्या पर्यटन मंत्री पॅट्रिशिया डे लिले आणि दक्षिण आफ्रिकन टुरिझन सीईओ नोम्बुलेलो गुलिवे भारताच्या दौऱ्यावर आहेत. मुंबईतील माध्यमांशी संवाद साधताना मंत्री पॅट्रिशिया डे लिले यांनी भारत आणि दक्षिण आफ्रिका यांच्यातील नात्यावर भाष्य केलं. दक्षिण आफ्रिका यंदा आयसीसी टी२० क्रिकेट विश्वचषक २०२७ आयोजित करण्यासाठी तयारी करत आहे. त्यामुळे क्रिकेटप्रेमींना आकर्षित करण्यासाठी या स्पर्धेचा लाभ घेऊन प्रवासाची वाढती मागणी पूर्ण करणार आहेत.

मंत्री डे लिले यांनी सांगितले की, व्हिसा प्रकिया सोपी झाल्यास दोन्ही देशांमधील पर्यटनाचे नाते आणखी मजबूत होईल. दक्षिण आफ्रिका २०२५ मध्ये जी२० अध्यक्षपद स्वीकारण्यास तयार आहे. शाश्वत विकास, समन्वयित भरभराट आणि लोकांमधील नाते अधिक उत्तम करण्यासाठी वचनबद्ध आहेत.

मंत्री पॅट्रिशिया डे लिले म्हणाल्या की, 'भारत आणि दक्षिण आफ्रिकेतील नाते इतिहासात खोलवर रूजलंय. ही भेट महत्त्वाच्या क्षेत्रांमधील आमचा समन्वय सखोल करेल. आमची भेट भारताच्या प्रवास व्यापार भागीदारांसोबत समन्वय करण्याची संधी असेल. त्यातून अर्थपूर्ण सांस्कृतिक आणि आर्थिक देवाणघेवाणीला चालना मिळेल'.

दक्षिण आफ्रिकन टुरिझम सीईओ नोम्बुलेलो गुलिवे यांनी सांगितलं की, 'भारत आणि दक्षिण आफ्रिका या दोन्ही देशादरम्यान नातं निर्माण करण्यात पर्यटन अत्यंत महत्त्वाची भूमिका बजावण्याचं काम करते. आमच्या देशाचे अद्वितीय नैसर्गिक सौंदर्य, बहुरंगी संस्कृती आणि हॉस्पिटॅलिटी यांचे प्रदर्शन घडवत असताना भारतीय पर्यटकांना दक्षिण आफ्रिकेत अद्भुत अनुभव घेण्यासाठी आम्ही प्रेरित करू शकू, अशी आशा आहे. आम्ही दक्षिण आफ्रिकेला भारतीय पर्यटकांसाठी पहिल्या क्रमांकाचे स्थान बनवण्यासाठी वचनबद्ध आहोत'.