आपल्या शरीरातील हृदय हे एक प्रकारचं इंजिन आहे. हृदय आपल्या शरीरातील सतत रक्त पंप करतं आणि आपल्याला जिवंत ठेवतं. मात्र हृदयापर्यंत पोहोचणाऱ्या धमन्यांमध्ये अडथळा निर्माण झाला, तर तो मोठा धोका ठरू शकतो.

हृदय ब्लॉकेज म्हणजे हृदयाच्या धमन्यांमध्ये अडथळा येणं. ही समस्या हळूहळू वाढत जाते. मात्र पण शरीर काही लक्षणांद्वारे वेळेत इशारा देतं. ही लक्षणं ओळखून आपण हृदयविकाराचा झटका किंवा हृदयाच्या इतर समस्या टाळता येऊ शकतात. ही लक्षणं कोणती आहेत ती जाणून घेऊया.

छातीत वेदना व जडपणा

छातीत अधूनमधून दडपण जाणवणं, जळजळ होणं किंवा जडपणा वाटणं हे हृदय ब्लॉकेजचं सर्वात सामान्य लक्षण आहे. याला वैद्यकीय भाषेत एंजायना म्हटलं जातं. ही वेदना कधी कधी खांदा, हात किंवा पाठीपर्यंत पसरते. अशी लक्षणं वारंवार जाणवत असतील तर लगेच डॉक्टरांकडे तपासणी करणं आवश्यक आहे.

श्वास घ्यायला त्रास

थोडंसं चालल्यानंतर किंवा जिना चढल्यानंतर जर श्वास घ्यायला त्रास होत असेल, तर ते हृदयाच्या ब्लॉकेजचे संकेत असू शकतात. ब्लॉकेजमुळे हृदयापर्यंत पुरेशी ऑक्सिजन पोहोचत नाही, त्यामुळे श्वास घेण्यात अडचण येते.

सतत थकवा आणि अशक्तपणा

जास्त काम न करता देखील दिवसभर थकवा जाणवणं, नीट झोप झाल्यानंतरही अशक्तपणा राहणं ही देखील हृदय ब्लॉकेजची लक्षणं आहेत. धमन्यांमध्ये अडथळा आल्यामुळे शरीराला पुरेसं रक्त आणि ऑक्सिजन मिळत नाही, त्यामुळे सतत थकल्यासारखं वाटतं.

चक्कर येणं व बेशुद्ध होणं

हृदय ब्लॉकेजमुळे रक्तप्रवाहात अडथळा निर्माण होतो. त्यामुळे मेंदूपर्यंत पुरेसं रक्त पोहोचत नाही. परिणामी चक्कर येणं, डोकं हलकं वाटणं किंवा कधी कधी बेशुद्ध पडणं अशी लक्षणं दिसू शकतात. ही साधी कमजोरी समजून दुर्लक्ष करू नये.

पाय सुजणं

हृदय नीट काम करत नसेल तर शरीरात द्रव साचायला लागतो. त्यामुळे पाय, घोटे आणि पंजे सुजू शकतात. हे लक्षण हृदय ब्लॉकेजसोबतच हृदयविकाराचा इशाराही असू शकतो.

जास्त प्रमाणात घाम येणं

उन्हाळा किंवा व्यायामाशिवायही वारंवार जास्त घाम येणं हेही हृदय ब्लॉकेजचं लक्षण असू शकतं. ब्लॉकेजमुळे हृदयावर ताण येतो आणि त्यामुळे शरीर जास्त घाम गाळतं. विशेषतः छातीत वेदना होत असताना जास्त घाम येणं हे देखील गंभीर लक्षण आहे.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.