सध्याच्या बदलत्या जीवनशैलीमुळे अनेकांच्या झोपेच्या वेळा बदलल्या आहेत. त्यामुळे त्यांच्या शरीरावर नकळत गंभीर परिणाम होताना दिसतो. अशातच काहींना जर पहाटे ३ ते ५ दरम्यान आपसूक जाग येत असेल, तेव्हा हे शरीरासाठी गंभीर परिणाम असू शकतात. बऱ्याच जणांना माहितच असेल की, मध्यरात्रीत हलकीशी जाग येत असेल तर ही अत्यंत सामान्य बाब आहे. पण पुन्हा तुम्हाला झोप येत नसेल तर ही गंभीर समस्या आहे.

तज्ज्ञांच्या मते, तुम्हाला रोज रात्री ३ दरम्यान जाग येत असेल आणि पुन्हा झोप लागत नसेल तर यामागे अनेक कारणे असू शकतात. त्यामध्ये मानसिक तणाव, झोपेची चुकीची वेळ आणि तुमचे आरोग्य ही कारणे असू शकतात. यालाच वैज्ञानिक भाषेत 'निद्रानाश' ( insomnia) म्हंटले जाते. तुम्हालाही जर जाग येत असेल तर निद्रानाशाच्या आजाराबद्दल तज्ज्ञांकडून सल्ला घेणे आवश्यक आहे.

तुम्ही जर या समस्येवर वेळेत उपचार केले नाहीत तर तुम्हाला अनेक दैनंदिन समस्यांनाही सामोरे जावे लागेल. त्यात दिवसभर झोप येणे, कोणत्याही कामात लक्ष नसणे, दिवस भर आळस, कोणत्याही कामात लक्षकेंद्रीत न होणे झोप पुरी न झाल्याने चिडचिड होणे, कामाच्या वेळेस झोपेमुळे होणारे बिघाड अशा समस्यांना सामोरे जावे लागते. पुढे आपण पहाटे जाग येण्याची मूळ कारणे जाणून घेणार आहोत.

मेंदूचा ताण

मेंदूचा वाढलेला ताण तुमच्या मज्जातंतूला संकेत पाठवतो. त्यामुळे झोप अपूर्ण असतानाच तुम्हाला रात्रीत जाग येते. यामुळे रक्तदाब वाढतो आणि शारीरिक बदलामुळे पुन्हा झोप येत नाही.

वृद्धत्व

प्रत्येक व्यक्तीची झोप ही त्याच्या वयानुसार बदलत असते. वृद्ध लोक त्यांच्या औषधांच्या वेळेनुसार झोपेचे नियोजन करतात. त्यामुळे त्यांच्या झोपेवर परिणाम होतो.

आजारी रुग्ण

ज्या व्यक्तींना काही आजार असतात, वेदना होत असतात त्यांना रात्री अचानक जाग येण्याच्या समस्येला सामोरे जावे लागू शकते.

दैनंदिन जीवनशैली

ज्या व्यक्तींना रोजच्या रोज लॅपटॉप, मोबाईल किंवा स्क्रीनसमोर बसावे लागते, अशांना झोपेच्या समस्यांना सामोरे जावे लागते. त्यामुळे शक्य तितक्या कमी प्रमाणात या उपकरणांचा वापर करुन तुम्ही निद्रानाशाच्या समस्येला टाळू शकता.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.