Brain Stroke Symptoms: थकवा समजून दुर्लक्ष करू नका, ही असू शकतात ब्रेन स्ट्रोकची लक्षणे; तज्ज्ञांकडून धक्कादायक माहिती

Brain Stroke Symptoms: मेंदू हा मानवाच्या जीवनातला सगळ्यात महत्वाचा आणि अविभाज्य घटक असतो. मेंदूशिवाय आपले शरीर कोणतीच क्रिया किंवा कार्य करत नाही. त्यातच सध्या ब्रेन स्ट्रोकचा धोका अनेकांमध्ये वाढत चालला आहे. बदलत्या जीवनशैलीमुळे हा बदल होत असल्याचे तज्ज्ञांचे मत आहे. ब्रेन स्ट्रोक अचानक होतो आणि तो रुग्णाच्या आयुष्यावर खोलवर परिणाम करू शकतो.

अनेक वेळा लोक सुरुवातीची लक्षणे ओळखत नाहीत किंवा त्याकडे दुर्लक्ष करतात, ज्यामुळे गंभीर परिणामांना सामोरे जावे लागते. या विषयावर तज्ज्ञ सांगतात की, जर ब्रेन स्ट्रोकची सुरुवातीची लक्षणे लगेच ओळखली गेली आणि वेळेवर उपचार केले गेले, तर रुग्णाचा जीव वाचवणे शक्य आहे.

अलीकडच्या काळात तरुणांमध्येही ब्रेन स्ट्रोकच्या घटना वाढताना पाहायला मिळत आहे. यामागचे मोठे कारण म्हणजे जास्त कामाचा ताण, सततचा मानसिक तणाव, असंतुलित आहार आणि पुरेशी झोप न मिळणे. या कारणांमुळे शरीरावर होणारा ताण थेट मेंदूवर परिणाम करून स्ट्रोकची शक्यता निर्माण करतो.

स्ट्रोकदरम्यान रुग्णांना मोठ्या प्रमाणात डोकेदुखी, अचानक चक्कर , डोळ्यांना धूसर दिसणे, बोलण्यात अडचण येणे, चेहरा, हात किंवा पाय सुन्न होणे अशी अनेक लक्षणे जाणवायला सुरुवात होते. अनेकदा नकळत तोल जाणे, चालण्यात त्रास होणे किंवा वारंवार पडणे, अशक्तपणा हे देखील गंभीर इशारे मानले जातात. परंतु लोक ही लक्षणे थकवा किंवा साधी शारीरिक कमजोरी समजून दुर्लक्ष करतात.

जर वेळेवर लक्ष दिले गेले नाही तर स्ट्रोकचे दुष्परिणाम अधिक गंभीर होऊ शकतात. यात अर्धांगवायू, स्मृती कमी होणे, बोलता न येणे, नैराश्य आणि मानसिक ताण वाढणे या समस्या उद्भवतात. सर्वात गंभीर बाब म्हणजे वेळेत उपचार न झाल्यास स्ट्रोक जीवघेणाही ठरू शकतो. आरोग्य तज्ज्ञांच्या मते, ताण कमी करणे, नियमित व्यायाम करणे, पुरेशी झोप घेणे आणि संतुलित आहार घेणे हे स्ट्रोक टाळण्यासाठी महत्त्वाचे आहे. त्यामुळे शरीर आणि मनाची काळजी घेणे, तसेच सुरुवातीची लक्षणे ओळखून त्वरित डॉक्टरांचा सल्ला घेणे आवश्यक आहे.