हिंदू धर्मात रामनवमी मोठ्या थाटात साजरी केली जाते. या दिवशी प्रभू राम यांचा जन्मदिवस असतो. हा दिवस चैत्र नवरात्रीच्या नवव्या म्हणजेच शेवटच्या दिवशी साजरा केला जातो. पुढील माहितीत आपण या दिवसाचे शुभ मुहूर्त तारिख आणि या दिवशी कोणते पारंपारिक पदार्थ बनवले जातात? याबद्दल जाणून घेणार आहोत.

यंदा चंद्राच्या तिथीमुळे रामनवमीच्या तारखेबाबत काहीसा संभ्रम निर्माण झाला आहे. २०२६ साली रामनवमी २६ मार्च, गुरुवारी साजरी केली जाणार आहे. चैत्र शुक्ल नवमी तिथी २६ मार्च रोजी सकाळी ११:४६ वाजता सुरू होईल. उदय तिथीनुसार ही तिथी २७ मार्चपर्यंत राहणार असल्यामुळे त्या दिवशीही पूजा-अर्चा केली जाऊ शकते. रामनवमीच्या दिवशी मध्यान्ह मुहूर्ताला विशेष महत्त्व असते. २६ मार्च रोजी सकाळी ११:१५ ते दुपारी १:४३ या वेळेत पूजेसाठी शुभ मुहूर्त आहे, तर मध्यान्ह क्षण दुपारी १२:२९ वाजता आहे. २७ मार्च रोजीही जवळपास त्याच वेळेत पूजेसाठी शुभ कालावधी उपलब्ध आहे.

रामनवमीला अनेक भक्त उपवास पाळतात. काहीजण दुपारपर्यंत उपवास करतात, तर काहीजण दिवसातून एकदाच भोजन करतात. उपवासादरम्यान फळं, दूध, दही यांसारखे हलके पदार्थ खाल्ले जातात. तसेच कांदा-लसूण आणि तिखट मसाले टाळून सैंधव मिठाचा वापर केला जातो. चैत्र नवरात्रीचा हा शेवटचा दिवस असल्याने अनेक घरांमध्ये कंजक पूजा किंवा कन्या पूजन केले जाते.

रामनवमीच्या निमित्ताने पारंपरिक पदार्थांनाही विशेष महत्त्व असते. उकडलेले काळे चणे, रव्याचा हलवा, पुरी, खीर आणि दही भल्ला यांसारखे पदार्थ प्रसाद म्हणून तयार केले जातात आणि भगवान रामाला अर्पण केले जातात. हे पदार्थ साधेपणाने बनवले जातात आणि भक्तिभावाने सादर केले जातात.

रामनवमी हा सण भक्ती, श्रद्धा आणि साधेपणाचा संदेश देणारा आहे. विधीपूर्वक पूजा आणि पारंपरिक परंपरांचे पालन करून भक्तगण प्रभू रामाचा जन्म मोठ्या आदराने आणि आनंदाने साजरा करतात.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं कुठलेही समर्थन अथवा दावा करत नाही.