कोकणात फिरण्यासाठी पत्येक जण आतूर असतो. मुंबईच्या धकाधकीच्या जीवनातून वेळ काढून आवर्जून तो कोकणची सफर करतो. पावसात कोकणाचे सौंदर्य आभाळाला गवसणी घालते. आपण अनेक वेळा कोकणातील समुद्रकिनारे, धबधबा यांना भेट देतो. पण कोकणात आध्यात्मिक वातावरणही मनाला प्रसन्न करणारे आहे. कोकणात अशी अनेक मंदिरे आहेत ज्यांचे पावसाळ्यात सौंदर्य खुलून येते. निसर्गाच्या सानिध्यात 'या' मंदिरांमध्ये तुम्हाला स्वर्गसुख अनुभवायला मिळेल.

मार्लेश्वर देवस्थान

मार्लेश्वर मंदिर रत्नागिरी मारळ येथे आहे. हे शंकराचे प्रसिद्ध मंदिर आहे. रत्नागिरी पासून हे सर्वात जवळ आहे. मार्लेश्वर मंदिर डोंगरावर वसलेले आहे. त्यामुळे पावसात याचे सौंदर्य आणखी वाढते. आकाशात धुक्यामध्ये हे सौंदर्य अजून खुलते. या मंदिराच्या सभोवताली अनेक धबधबे पाहायला मिळतील. तसेच मार्लेश्वर मंदिरात पोहचण्यासाठी तुम्हाला डोंगर चढावा लागतो. या मंदिराच्या बाजूनेच एक नदी वाहत असते. मार्लेश्वर मंदिरातून तुम्हाला फेसाळलेला धबधबा पाहायला मिळतो. याचा प्रवाह मात्र कमी असतो. अशा निसर्गरम्य परिसरातील तुम्ही मंदिरापर्यंत पोहचू शकता.

पोखरबाव गणपती मंदिर

पोखरबाव गणपती मंदिर हे देवगडमध्ये आहे. देवगड बीचपासून पोखरबाव गणपती मंदिर खूप जवळ आहे. हे गणपतीचे मंदिर आहे. तसेच येथे स्वयंभू शिवलिंग पाहायला मिळते. येथे तुम्हाला पांडवकालीन विहीर पाहता येईल. पावसाळ्यात ही विहीर तुडुंब भरते. हे दृश्य मनाला मोहून टाकते. येथील शिवलिंग श्री ओंकारेश्वर शिव पिंड म्हणून ओळखले जाते.

हिरण्यकेशी मंदिर

आंबोली घाटात सावंतवाडी पासून हिरण्यकेशी मंदिर जवळ आहे. हे मंदिर माता पार्वतीचे आहे. या मंदिरातून हिरण्यकेशी नावाची नदी उगम पावते. ही नदी मंदिराच्या गाभाऱ्यातून उगम पावत असल्यामुळे समोरील तळ्यात तुम्हाला स्वच्छ पाणी बघायला मिळते. असे म्हटलं जातं.