हिंदू धर्मात प्रत्येक दिवस एखाद्या ना एखाद्या देवाला समर्पित मानला जातो. त्याप्रमाणे रविवारचा दिवस सूर्यदेवाला अर्पण केला जातो. या दिवशी सूर्यदेवाची पूजा केल्याने शुभ फळ मिळतं. त्यामुळे रविवारी उगवत्या सूर्याला जल अर्पण करणं अत्यंत शुभ मानलं जातं.

असं मानलं जातं की, जर एखाद्याच्या कुंडलीत सूर्याची स्थिती कमजोर असेल, तर त्या व्यक्तीचे प्रयत्न व्यर्थ ठरतात आणि यशाचं फळ मिळत नाही. सूर्यदेवाला प्रसन्न करण्यासाठी रविवारी काही खास उपाय करणं अत्यंत फायदेशीर ठरतं. हे उपाय केल्यास सूर्य ग्रहाची कुंडलीतील स्थिती बळकट होते आणि जीवनातील अडचणी दूर होतात.

उगवत्या सूर्याला अर्घ्य द्या

रविवारी सकाळी लवकर उठून स्नान करून पूर्वदिशेला तोंड करून उगवत्या सूर्याला तांब्याच्या लोट्यातून स्वच्छ पाणी अर्पण करा. यावेळी 'ॐ सूर्याय नमः', 'ॐ वासुदेवाय नमः' आणि 'ॐ आदित्याय नमः' हे मंत्र उच्चारल्याने सूर्यदेव प्रसन्न होतात.

लाल चंदनाचा तिलक लावा

रविवारी घरातून बाहेर पडताना कपाळावर लाल चंदनाचा तिलक लावावा. हा तिलक यश, आत्मविश्वास आणि उर्जेचं प्रतीक मानला जातो. याशिवाय, या दिवशी लाल रंगाचे कपडे घालणं शुभ मानलं जातं. लाल रंग सूर्याशी संबंधित असून यामुळे महत्त्वाचे काम यशस्वीरीत्या पार पडतात, असं मानलं जातं.

दरवाज्यावर दिवा लावा

रविवारी संध्याकाळी आपल्या घराच्या मुख्य दरवाज्याजवळ तुपाचा दिवा लावा. असं केल्याने सूर्यदेव आणि लक्ष्मीमाता दोघंही प्रसन्न होतात आणि धनसंबंधी अडचणी कमी होतात.

वडाच्या पानाचा उपाय

जर तुमचं एखादं मनापासून काही पूर्ण व्हावं असं वाटत असेल, तर ते आपल्या हाताने वडाच्या पानावर लिहा आणि ते पान जवळच्या नदीत किंवा वाहत्या पाण्यात सोडून द्या. हा उपाय तुमची मनोकामना पूर्ण होण्यासाठी अत्यंत प्रभावी मानला जातो.

दान केल्याने मिळतो लाभ

रविवारी सूर्यदेवाला प्रसन्न करण्यासाठी गूळ, दूध, तांदूळ आणि लाल कपड्यांचे दान करणं शुभ मानलं जातं. या गोष्टी दान केल्याने सूर्याची कृपा मिळते आणि आयुष्यात सुख, समाधान व चांगलं आरोग्य प्राप्त होतं.

(Disclaimer - या ठिकाणी दिलेली माहिती ज्योतिष शास्त्रावर आधारित असून ती केवळ माहितीसाठी दिली जात आहे. आम्ही या गोष्टींना दुजोरा देत नाही. कोणताही उपाय करण्यापूर्वी संबंधित विषयातील तज्ज्ञांचा सल्ला अवश्य घ्या.)