इंजिनीयर म्हटलं की तो आयटी कंपनीमध्ये काम करतो, असं चित्र आपल्या डोळ्यासमोर उभं राहतं. जर तुम्हीही आयटी कंपनीमध्ये काम करत असाल तर ही बातमी तुमच्यासाठी आहे. सध्या आयटी कंपन्यांची संख्या झपाट्याने वाढतेय. मात्र चिंतेची बाब म्हणजे जास्त कामाचे तास, अधिक वेळ बसून राहणं, अयोग्य आहार आणि ताणतणाव यामुळे या क्षेत्रात काम करणाऱ्या लोकांना मेटाबॉलिक डिसफंक्शन-असोसिएटेड फॅटी लिव्हर डिसीज (MAFLD) होण्याची शक्यता असते.

हैदराबाद विद्यापीठ आणि एशियन इन्स्टिट्यूट ऑफ गॅस्ट्रोएन्टेरोलॉजी (AIG) यांनी नुकतंच एक संशोधन केलं आहे. या संशोधनात असं आढळून आलं की, सुमारे 84% आयटी क्षेत्रात काम करणाऱ्यांना फॅटी लिव्हरचा त्रास असल्याचं समोर आलं आहे. ज्यावेळी लिव्हरमध्ये जास्त चरबी जमा होते तेव्हा फॅटी लिव्हर होतो. अशा परिस्थितीत, जर त्यावर उपचार केले नाहीत तर ते सिरोसिस, यकृत निकामी होणं किंवा अगदी यकृताच्या कॅन्सरसारखे गंभीर आजार देखील होऊ शकतात.

काय आहे फॅटी लिव्हरची लक्षणं?

• सामान्य हालचाली करून थकवा जाणवणं

• ओटीपोटात जडपणा येणं

• आहार किंवा हालचालींमध्ये कोणताही बदल न करता वजन वाढणं

• सतत तहान लागणं

• वारंवार लघवी होणे

• रक्तातील यकृत एंजाइम (ALT आणि AST) चा स्तर वाढणं

लिव्हरला निरोगी राखण्यासाठी काही उपाय

रिकाम्या पोटी ब्लॅक किंवा लिंबू पाणी पिणं

काळी कॉफी यकृतासाठी फायदेशीर ठरू शकते. हे लिव्हरमधील चरबी कमी करण्यास मदत करते. याशिवाय, एक ग्लास कोमट लिंबू पाणी प्या. हे शरीरातील टॉक्सिक पदार्थ काढून टाकण्यास मदत करून पचन सुधारत.

20-20-20 नियम

आयटी क्षेत्रात काम करणाऱ्यांना बराच वेळ बसून राहावं लागतं. मात्र ही सवय त्यांच्या आरोग्यासाठी धोकादायक आहे. अशा परिस्थितीत, दर २० मिनिटांनी २० सेकंद उभे राहा आणि २० फूट दूर पहा. यामुळे डोळ्यांचा थकवा कमी होतो आणि रक्ताभिसरण देखील सुधारतं.

जेवणानंतर पायी चाला

जेवणानंतर १० मिनिटं चालणं तुमच्या लिव्हरसाठी खूप फायदेशीर आहे. हे रक्तातील साखरेची पातळी नियंत्रित करण्यास, पचन सुधारण्यास आणि लिव्हरमध्ये चरबी जमा होण्यास प्रतिबंध करण्यास मदत करतं.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.