हृदयविकाराचा झटका म्हणजेच हार्ट अटॅक ही सगळ्यात गंभीर आणि जीवघेणी समस्या असते. ही समस्या किंवा हा जीवघेणा आजार आता ३० वर्षांपासून ते वृद्धांपर्यंत झपाट्याने वाढताना दिसतोय. अर्थात याचे कारण तुमची बदललेली जीवनशैली आहे. त्यामुळे तुम्ही कोणत्याच समस्यांना दुर्लक्षित करु नका. शरीराशी संबंधित समस्या दुर्लक्षित केल्याने तुम्हाला नकळत जीवघेण्या आजारांचा सामना करावा लागतो. त्यात हार्ट अटॅकचा धोका सगळ्यात जास्त असतो.

तज्ज्ञांच्या मते तुम्हाला तुमच्या जीवनशैली हलक्या आणि सामान्य दुखण्यांकडे दुर्लक्ष करणं चांगलच महागात पडू शकतं. सध्याच्या धकाधकीच्या जीवनामुळे अनेकांच्या खाण्यापिण्याच्या वेळा बदलल्यात. इतकंच नाहीतर तर कामानिमित्त तासंतास घराबाहेर असतात, अशावेळेस नाश्त्यासाठी, कधीकधी जेवणासाठी लोक भरपूर पैसा खर्च करुन रेस्टॉरंट्समध्ये जातात. त्यामध्ये तळलेले पदार्थ, ऑयली पदार्थ, जंक फूड्स यासगळ्याचा समावेश होतो. यानेच तुम्हाला हार्ट अटॅकला सामोरं जावं लागतं.

हार्ट अटॅक म्हणजे हृदयाच्या स्नायूंना जाणारा रक्तप्रवाह अचानक थांबतो किंवा कमी होतो. हृदयाला ऑक्सिजन पोहोचवणाऱ्या कोरोनरी आर्टरीमध्ये रक्ताची गाठ जेव्हा तयार होते तेव्हा रक्तप्रवाहात अडथळे निर्माण होतात. त्यामुळे कोणतंही वेगळं लक्षण किंवा शरीरात काही बदल होताना जाणवत असतील तर त्यावर उपचार घेणं खूप गरजेचं आहे. त्यात अनेकांचा समज आहे की, हार्ट अटॅक म्हणजे छातीत दुखणं. पण तज्ज्ञांच्या मते, छातीत दुखणं हे एकमेव लक्षण नाही.

अनेक वेळा हार्ट अटॅकची लक्षणे रात्री झोपेतही जाणवतात. विशेषतः महिलांना, अचानक खूप थकवा जाणवत असेल तर हे हार्ट अटॅकचं महत्त्वाचं लक्षण असू शकतं. कोणतंही जड काम न करता सुद्धा शरीर खूप थकल्यासारखं वाटत असेल, तर ते दुर्लक्षित करू नका. त्यासोबत हृदयाची धडधड अचानक वाढणं किंवा अनियमित होणं हे देखील धोक्याचं लक्षण ठरू शकतं.

काही रुग्णांना हार्ट अटॅकच्या वेळी मळमळ, उलटी सारखं वाटतं. काहींना डाव्या हातात, मानेत, पाठीमध्ये किंवा पोटातही वेदना होतात. तर काही वेळा जबड्यात वेदना जाणवतात. हे लक्षण फारसं ओळखलं जात नाही, पण छातीत दुखणं, धडधड किंवा थकवा यासोबत जबड्यात वेदना होत असतील, तर ते हार्ट अटॅकचं गंभीर लक्षण असू शकतं.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.