बर्‍याचदा लोकांना वारंवार लघवी होण्याची समस्या जाणवते. वैद्यकीय भाषेत याला ‘फ्रिक्वेंट युरिनेशन’ असे म्हणतात. काहीवेळा जास्त पाणी पिणे किंवा औषधांचा दुष्परिणामामुळे हा परिणाम जाणवतो. मात्र ही समस्या सतत राहिली तर ती गंभीर आजाराचे लक्षणही ठरू शकते. यामुळे ऑफिसमध्ये काम करताना त्रास होतो, झोपेवर परिणाम होतो. काही जण या भीतीने पाणी पिणे टाळतात आणि त्यामुळे डिहायड्रेशनसारख्या समस्या निर्माण होतात.

तज्ञांच्या मते, वारंवार लघवी होण्यामागे अनेक कारणे असू शकतात. मधुमेहाच्या रुग्णांमध्ये रक्तातील साखरेची पातळी वाढल्यास मूत्रपिंड अतिरिक्त ग्लुकोज बाहेर टाकतात. त्यामुळे लघवीची वारंवारता वाढते. अतिक्रियाशील मूत्राशय हीदेखील एक अवस्था आहे ज्यात मूत्राशय पूर्ण न भरताही लघवीची तीव्र इच्छा होते. काहीवेळा कॅफिन, अल्कोहोल किंवा खूप द्रवपदार्थ प्यायल्यामुळे ही समस्या उद्भवते. महिलांमध्ये गर्भधारणेदरम्यान गर्भाशयाचा दबाव मूत्राशयावर येतो ज्यामुळे लघवी वाढते.

मूत्रमार्गाचा संसर्ग UTI किंवा मूत्रपिंडाचा संसर्ग झाल्यास देखील लघवीची वारंवारता वाढते. अशावेळी जळजळ, ताप, पाठदुखी आणि मळमळ यासारख्या लक्षणांकडेही लक्ष देणे आवश्यक आहे. पुरुषांमध्ये वाढलेली प्रोस्टेट ग्रंथी किंवा मूत्राशयातील दगड-गाठी देखील कारण ठरू शकतात. एवढेच नव्हे तर ताण-तणाव आणि चिंता यामुळेही स्नायू आकुंचन पावून वारंवार लघवी होऊ शकते.

तज्ज्ञ सांगतात की, ही समस्या सातत्याने होत असेल तर ती केवळ सामान्य नाही तर गंभीर आरोग्य समस्येचे संकेत असू शकतात. त्यामुळे वेळेत डॉक्टरांचा सल्ला घेऊन आवश्यक ती तपासणी व उपचार करणे अत्यंत महत्त्वाचे आहे.