नुकतंच बॉलिवूड अभिनेते परेश रावल यांनी एका इंटरव्यूमध्ये एक धक्कादायक खुलासा केला आहे. यामध्ये त्यांनी दावा केला आहे की, ते स्वतःची लघवी प्यायले होते. त्यांच्या या विधानानंतर सोशल मीडियावर एकच मोठी खळबळ उडाली. काही व्यक्ती याला घरगुती उपाय म्हणून ही गोष्ट आरोग्यासाठी चांगली असते, असं म्हणतात. मात्र खरंच मानवाची लघवी औषध म्हणून काम करते का, याचं उत्तर आपण डॉक्टरांकडून जाणून घेतलंय.

परेश रावल यांचा दावा

एका इंटरव्ह्यूमध्ये बोलताना परेश रावल यांनी खुलासा केला होता की, गुडघ्याच्या दुखाण्याला बरं करण्यासाठी ते १५ दिवस स्वतःची लघवी पीत होते. मुंबईच्या मासळी बाजारात एका सिनेमाच्या शूटींगदरम्यान गुडघ्याला दुखापत झाली होती. यानंतर रूग्णालयात दाखल केलं गेलं.

दरम्यान यावेळी अजय देवगनचे वडील वीरू देवगन परेश रावल यांना भेटायला आले होते. त्यावेळी त्यांनी परेश यांनी लघवी पिण्याचा सल्ला दिला होता. जेणेकरून ते लवकर बरे व्हावेत. मुख्य म्हणजे परेश रावल यांनी असं केलं आणि ते बरे देखील झाले.

खरंच लघवी पिणं आरोग्यासाठी योग्य?

यासंदर्भात मुंबईतील डॉ. योगेश दळवी यांनी सांगितलं की, आपली लघवी ही सामान्यपणे शरीरातील निघालेलं वेस्ट म्हणजेच कचरा असतो. यामध्ये युरिया, टॉक्सिन्स आणि इतर घाण घटक असतात. हे घटक शरीरातून बाहेर टाकले जातात. वैज्ञानिक दृष्टीकोनातून पाहिलं तर युरिन पिणं हे आरोग्यासाठी अजिबात फायदेशीर नाही. उलट यामुळे इन्फेक्शन आणि आजारांचा धोका वाढू शकतो.

लघवी प्यायल्याने होणाऱ्या समस्या

इन्फेक्शन

डॉक्टरांच्या सांगण्याप्रमाणे, लघवीमध्ये बॅक्टेरिया असतात जे पुन्हा शरीरात जाऊन पसरू शकतात. यामुळे पोटावर विपरीत परिणाम होतो. परिणामी तुम्हाला इन्फेक्शन होऊ शकतं.

किडनीवर परिणाम

लघवीमध्ये असलेलं टॉक्सिन पुन्हा शरीरात गेल्यास किडनीवर दबाव येतो. ही घाण किडनीला पुन्हा फिल्टर करावी लागू शकते. त्यामुळे समस्या वाढू शकतात.

डिहायड्रेशन

लघवी प्यायल्याने शरीरातील पाणी कमी होईन डिहायड्रेशनचा त्रास होऊ शकतो. लघवीमध्ये मीठ आणि वेस्ट मटेरियल असतं. त्यामुळे हे प्यायल्याने शरीरातील पाणी कमी होऊ शकतं.

लघवी पिऊन कोणी बरं होऊ शकतं का?

काही प्राचीन उपचारपद्धतींमध्ये लघवीला उपाचारांचा भाग मानलं जातं होतं. याला 'ऑटो यूरिन थेरेपी' असं म्हटलं जायचं. मात्र सध्या मेडिकल सायन्समध्ये याबाबत कोणतेही ठोस पुरावे नाहीत. लघवी प्यायल्याने माणून आजारी पडू शकतो.