आपल्या समाजात असे काही आजार आहेत ज्यांच्या बाबत अजून जनजागृती होण्याची फार गरज आहे. यातील एक आजार म्हणजे एड्स. दरवर्षी 1 डिसेंबर हा जागतिक एड्स दिन म्हणून मानला जातो. जागतिक आरोग्य संघटनेने यंदाच्या जागतिक एड्स दिनानिमित्त 'योग्य मार्ग निवडा: माझं आरोग्य, माझा हक्क!' अशी थीम स्वीकारली आहे.

आज या दिवसाच्या निमित्ताने तुम्हाला एचआयव्ही आणि एड्समधील सामान्य फरक याशिवाय शरीरात दिसणाऱ्या सुरुवातीच्या लक्षणांबद्दल माहिती देणार आहोत. जर ही लक्षणं एखाद्यामध्ये दिसू लागली तर त्याने ताबडतोब स्वतःची तपासणी करून घेणं फायदेशीर आहे. जेणेकरून वेळेवर निदान आणि उपचारांच्या मदतीने आपण सामान्य जीवन जगू शकता.

HIV आणि Aids मध्ये नेमका फरक काय?

HIV म्हणजे ह्युमन इम्युनोडेफिशियन्सी व्हायरस. हा एक व्हायरस आहे जो शरीराच्या रोगप्रतिकारक शक्तीवर हल्ला करतो. त्याच वेळी, एड्स म्हणजे ऍक्वायर्ड इम्युनोडेफिशियन्सी सिंड्रोम. जो एचआयव्ही संसर्गाच्या शेवटच्या टप्प्यात होतो. एचआयव्हीचे पहिले दोन टप्पे म्हणजे अक्युट एचआयव्ही संसर्ग आणि क्रॉनिक एचआयव्ही संसर्ग.

Aids ची लक्षणं काय दिसून येतात?

वर्ल्ड हेल्थ ऑर्गनायझेशननुसार, ज्यावेळी एखाद्या व्यक्तीला एड्स होतो तेव्हा इन्फ्लूएंझा सारख्या रोगाची लक्षणं दिसून येतात. या लक्षणांमध्ये ताप, डोकेदुखी, शरीरावर पुरळ येणं आणि घसा खवखवणं यांसारख्या समस्यांचा समावेश होतो. एड्समुळे तुमची इम्युनिटी शक्ती कमकुवत होते. अशा स्थितीत तुम्हाला लिम्फ नोड्सना सुज येणं, अस्पष्ट वजन कमी होणं, ताप, अतिसार आणि खोकला ही लक्षणंही दिसून येतात.

दुर्लक्ष करू नये

वर्ल्ड हेल्थ ऑर्गनायझेशनच्या सांगण्यानुसार, एड्सच्या सुरुवातीच्या लक्षणांकडे दुर्लक्ष करून वेळेवर उपचार न घेतल्याने अनेक गंभीर परिस्थिती उद्भवू शकते. यामध्ये क्षयरोग (टीबी), क्रिप्टोकोकल मेनिन्जाइटिस, गंभीर बॅक्टेरियर इन्फेक्सन आणि लिम्फोमा आणि कपोसी सारकोमा यांसारख्या कॅन्सरचा समावेश आहे. वेळेवर उपचार न केल्यास एचआयव्हीमुळे हेपेटायटीस सी, हेपेटायटीस बी हे इन्फेक्शन देखील होऊ शकतात.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.