नारळपाणी एक नैसर्गिक सुपरड्रिंक आहे. नारळाचे पाणी पिल्याने शरीर नैसर्गिकरित्या हायड्रेट राहते, पचन सुधारते आणि ते त्वचेसाठीही फायदेशीर ठरते. रुग्णाला ऊर्जा मिळावी यासाठी डॉक्टर सुद्धा नारळाचे पाणी पिण्याचा सल्ला देतात. यात अँटीऑक्सिडंट्स आणि व्हिटॅमिन सी असते जे रोगप्रतिकारशक्ती वाढवण्यास मदत करते. पण तुम्हाला माहित आहे का? नारळाचे पाणी आरोग्यासाठी गुणकारी असले तरी ते सगळ्यांसाठीच फायदेशीर ठरत नाही. काही लोकांसाठी ते धोकादायक ठरू शकते. चला तर मग जाणून घेऊया.

नारळाच्या पाण्यात साधारणपणे प्रति २०० मिली सर्व्हिंगमध्ये सुमारे ६-७ ग्रॅम साखर असते. साखरेचे हे प्रमाण फळांचा रस किंवा सॉफ्ट ड्रिंक्समध्ये असलेल्या साखरेपेक्षा कमी असले तरी, ती रक्तातील ग्लुकोजच्या पातळीवर परिणाम करू शकते. म्हणून मधुमेह असणाऱ्या लोकांनी नारळाचे पाणी पिणे टाळावे. शिवाय नारळाच्या पाण्यात मोठ्या प्रमाणात पोटॅशिम असते. हे एक असे खनिजे आहे जे हृदयाच्या कार्यात महत्त्वाची भूमिका बजावते. परंतु आधीपासुन किडनीचे आजार असणाऱ्या लोकांसाठी जास्त पोटॅशियमचे सेवन धोकादायक ठरू शकते.

नारळाचे पाणी थंड गुणधर्माचे असते. जे शरीराला नैसर्गिकरित्या थंडावा देते. ते उष्ण हवामान किंवा उन्हाळ्यात फायदेशीर असले तरी, सर्दि किंवा खोकला असल्यास नारळाचे पाणी समस्या निर्माण करू शकते. तसेच जर तुम्हाला उच्च रक्तदाबाची समस्या असेल. आणि तुम्ही ACE इनहिबिटर किंवा पोटॅशियम-सेव्हिंग डाययुरेटिक्स सारखी पोटॅशियम राखून ठेवणारी औषधे घेत असाल. तर त्यावर नारळ पाणी पिल्याने शरीरातील पोटॅशियमची पातळी वाढून छातीत दुखणे, मळमळणे, स्नायू कमकुवत होणे अशा समस्या उद्भवू शकतात.

जर तुम्हाला तुमच्या डॉक्टरांकडून कमी पोटॅशियम किंवा इलेक्ट्रोलाइट्स असलेला आहार घेण्याचा सल्ला मिळाला असेल. तर नारळपाणी तुमच्यासाठी योग्य पेय ठरत नाही. नारळ पाण्यातील पोटॅशियम, सोडियम आणि मॅग्नेशियमचे मिश्रण तुमच्या शरीरातील इलेक्ट्रोलाइट्सचे संतुलन बिघडवू शकते. आणि थकवा येणे, स्नायूंमध्ये पेटके येणे तसेच हृदयाची असामान्य लय अशी लक्षणे दिसू लागतात. यामुळे केव्हाही नारळपाणी पिण्याआधी तुमच्या डॉक्टरांनी किंवा आहारतज्ञांनी ठरवलेल्या आहार मार्गदर्शकाचे पालन करा.