थंडीच्या दिवसांत पाणी गरम करण्यासाठी अनेक जण इमर्शन रॉडचा म्हणजेच हिटरचा वापर करतात. हे पाणी गरम करण्याचं एक सोपं आणि स्वस्त प्रोडक्ट आहे. मात्र, जर याची वेळोवेळी स्वच्छता केली नाही, तर काही महिन्यांतच या त्याच्या कॉईलवर पांढरा थर साचतो. हा थर रॉडची कार्यक्षमता कमी करतो आणि विजेचा वापर वाढवतो. त्यामुळे तुमचं लाईट बिल वाढतं आणि रॉडही लवकर खराब होतो.

जर तुमच्या इमर्शन रॉडवरही पांढरा थर जमा होत असेल तर तो स्वच्छ करण्यासाठी खालील काही घरगुती उपाय तुमच्यासाठी भन्नाट ठरणार आहेत.

रॉकेलचा वापर करा

इमर्शन रॉडवरील पांढरी थर काढण्यासाठी केरोसीन तेल किंवा रॉकेलचा वापर करू शकता. त्यासाठी रॉडवर केरोसीन तेल चांगलं लावा आणि ते १५ मिनिटांसाठी तसंच ठेवून द्या. या वेळेत थर मऊ होते. नंतर कोरड्या किंवा थोड्या ओल्या कापडाने रॉड नीट घासून घ्या. काही मिनिटांतच हा पांढरा थर निघून रॉड पुन्हा चमकदार दिसेल.

चुना, मीठ आणि लिंबाचा वापर

जर तुम्हाला नैसर्गिक पद्धतीने स्वच्छ करायचा असेल, तर चुना, मीठ आणि लिंबाचा रस वापरा. त्यासाठी आधी चुना आणि मीठ एकत्र करून घट्ट पेस्ट तयार करा आणि ती रॉडवर लावा. पाच मिनिटांनी या पेस्टवर लिंबू रगडा. काही वेळातच पांढरा थर कमी होईल आणि रॉड पुन्हा नवीन दिसेल.

बेकिंग सोडा आणि व्हिनेगरचा उपाय

बेकिंग सोडा हे सर्व प्रकारच्या स्केलिंग किंवा पांढऱ्या थर काढण्यासाठी फायदेशीर ठरतं. एका बादलीत पाणी घ्या आणि त्यात थोडं व्हिनेगर मिक्स करा. त्यात इमर्शन रॉड १० मिनिटे बुडवून ठेवा. नंतर बाहेर काढून ब्रशने हलकं घासून घ्या. काही मिनिटांत रॉड पुन्हा चमकेल. या सोप्या घरगुती उपायांनी इमर्शन रॉड स्वच्छ राहील, पाणी पटकन गरम होईल आणि विजेचा वापरही कमी होईल. त्यामुळे या थंडीत गरम पाण्याचा आनंद घ्या आणि विजेचा खर्च वाचवा.

टीप: वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं कुठलेही समर्थन अथवा दावा करत नाही.