स्तनाचा कॅन्सर हा भारतीय महिलांमध्ये झपाट्याने वाढणारा सर्वात मोठ्या प्रमाणात आढळून येणारा कॅन्सर आहे. राष्ट्रीय कॅन्सर नोंदणी कार्यक्रम (NCRP) आणि संबंधित अहवालांनुसार, स्तनाच्या कॅन्सरची स्थिती दिवसेंदिवस गंभीर होताना दिसतेय. महिलांमध्ये आढळणाऱ्या एकूण कॅन्सरपैकी सुमारे २६% प्रकरणं केवळ स्तनाच्या कर्करोगाची असतात. २०१९ ते २०२३ या ५ वर्षांत राज्यात स्तन कॅन्सरच्या रुग्णांच्या संख्येत सुमारे २८% नी वाढ झाल्याचं दिसून आलं आहे.

तज्ज्ञांच्या मते, जीवनशैलीतील सकारात्मक बदलांमुळे स्तनाच्या कॅन्सरला कारणीभूत घटकांवर नियंत्रण ठेवता येतं. संशोधनातून सिद्ध झाले आहे की, ज्या महिला नियमितपणे शारीरिकरित्या सक्रिय राहतात, त्यांच्यामध्ये स्तनाच्या कॅन्सरचा धोका १०% ते २५% पर्यंत कमी होतो.

व्यायामाचा अभाव हे अनेक रोगांचं मूळ कारण आहे. नियमित व्यायाम केल्याने केवळ वजन नियंत्रणात राहत नाही तर ते हार्मोनची पातळी संतुलित ठेवण्यास मदत करते आणि शरीरातील रोगप्रतिकारशक्ती वाढवते. तज्ज्ञांनी केलेल्या संशोधनानुसार, नियमित मध्यम व्यायाम करणाऱ्या महिलांमध्ये कॅन्सरचा धोका १०% ते २५% पर्यंत कमी होतो.

तळेगावच्या टीजीएच ऑन्को-लाइफ कॅन्सर सेंटरच्या रेडिएशन आणि क्लिनिकल ऑन्कोलॉजिस्ट डॉ ज्योती मेहता यांनी सांगितलं की, ब्रेस्ट कॅन्सर हा एक गंभीर आजार आहे. शिवाय हा आजार जीवघेणा आजार मानला जातो. मात्र तरीही तो पूर्णपणे अनियंत्रित नाही. योग्य जीवशैलीच्या मदतीने सकस आहार, नियमित व्यायाम आणि चुकीच्या सवयींपासून दूर राहिल्यास आपण या रोगापासून दूर राहू शकतो.

परंतु जीवनशैलीत बदल करण्यासोबतच चाळीशीनंतर नियमितपणे मॅमोग्राफी आणि स्वतः स्तनांची तपासणी करणं आवश्यक आहे. ब्रेस्ट कॅन्सरला प्रतिबंध करण्यासाठी योग्य जीवनशैली हा सर्वात मोठा आणि प्रभावी उपाय मानला जातो.