'लगान', 'सरफरोश' आणि 'गजनी' यांसारख्या सुपरहिट चित्रपटांमधील दमदार अभिनयाने प्रेक्षकांची मने जिंकणारे प्रसिद्ध अभिनेते प्रदीप रावत यांचे निधन झालंय. वयाच्या ७४ व्या वर्षी त्यांनी अखेरचा श्वास घेतला. त्यांचे सहकलाकार आणि जवळचे मित्र यशपाल शर्मा यांनी सोशल मीडियावर त्यांच्या निधनाची बातमी दिली आहे.

प्रदीप रावत हे बऱ्याच काळापासून कॅन्सरसारख्या जीवघेण्या आजाराशी झुंज देत होते. सुरुवातीला त्यांच्यावर मुंबईतील अंधेरी येथील कोकिलाबेन धीरूभाई अंबानी रुग्णालयात उपचार सुरू होते. मात्र त्यांची प्रकृती गंभीर असल्याने त्यांना नंतर दुसऱ्या रुग्णालयात हलवण्यात आले. तेथे डॉक्टरांनी शर्थीचे प्रयत्न केले मात्र प्रदीप रावत यांची मृत्यूशी असलेली झुंज अपयशी ठरली.

२१ जानेवारी १९५२ रोजी मध्य प्रदेशातील जबलपूर येथे जन्मलेल्या प्रदीप रावत यांनी १९८० च्या दशकात आपल्या अभिनय कारकिर्दीला सुरुवात केली. बी. आर. चोप्रा यांच्या 'महाभारत' या पौराणिक मालिकेद्वारे त्यांना खरी ओळख आणि प्रचंड लोकप्रियता मिळाली. या मालिकेत त्यांनी गुरू द्रोणाचार्यांचा पुत्र असलेल्या अश्वत्थामा या अजरामर आणि प्रभावी व्यक्तिरेखेची भूमिका साकारली. त्यांचा दमदार आवाज आणि प्रभावी व्यक्तिमत्त्व यांचा प्रेक्षकांवर इतका खोलवर प्रभाव पडला की, ते रातोरात चित्रपटसृष्टीतील एक प्रमुख चेहरा बनले होते. त्यांचा दमदार आवाज आणि व्यक्तिमत्त्व यांनी प्रेक्षकांची मने जिंकली. या मालिकेनंतर या अभिनेत्याने मागे वळून पाहिले नाही.

अभिनेता प्रदीप रावत अशा कलाकारांपैकी एक होते ज्यांनी बॉलिवूड आणि दाक्षिणात्य चित्रपटसृष्टी अशा दोन्ही क्षेत्रांत मोठ्या प्रमाणावर काम केले. त्यांनी आमीर खानच्या 'सरफरोश' चित्रपटात 'सुलतान'ची भूमिका साकारली होती, तसेच आशुतोष गोवारीकर यांच्या 'लगान'मध्ये ते 'देवा सिंग सोढी'च्या भूमिकेत दिसले होते. यासह त्यांनी आमीर खानच्या 'गजनी' चित्रपटात 'गजनी धर्मात्मा'ची भूमिका साकारली. या भूमिके जी प्रेक्षकांकडून अत्यंत पसंतीस उतरली.