सध्या सर्वत्र 'सेलिब्रिटी मास्टरशेफ'ची (Celebrity MasterChef) चर्चा पाहायला मिळत आहे. रोज या शोमध्ये नवीन राडा होत आहे. सेलिब्रिटींची रेसिपी बनवण्यासाठी तारेवरची कसरत पाहायला मिळत आहे. रोज यांना नवीन टास्क देण्यात येतो. कधी टीमवर्क तर कधी एकट्याने स्वादिष्ट पदार्थ बनवावा लागतो. 'सेलिब्रिटी मास्टरशेफ'ची लोकप्रियता दिवसेंदिवस वाढताना पाहायला मिळत आहे.

आता 'सेलिब्रिटी मास्टरशेफ'मध्ये पुन्हा एक राडा झाला आहे. 'सेलिब्रिटी मास्टरशेफ'च्या नवीन प्रोमोमध्ये ज्येष्ठ अभिनेत्री उषा नाडकर्णी (Usha Nadkarni ) ढसाढसा रडताना पाहायला मिळत आहेत. 'सेलिब्रिटी मास्टरशेफ'च्या नवीन टास्कमध्ये दोन-दोन स्पर्धकांच्या टीम करण्यात आल्या होत्या. यात फैजू-दिपिका कक्कर, उषा नाडकर्णी-राजीव अदातिया, कबिता सिंग-गौरव खन्ना आणि निक्की तांबोळी-तेजस्वी प्रकाश अशा जोड्या करण्यात आल्या होत्या.

'सेलिब्रिटी मास्टरशेफ'च्या नव्या टास्कमध्ये जोडीतील एका सदस्याला सायकल चालवायची होती तर दुसऱ्याला पदार्थ बनवायचा होता. या टास्कमध्ये गॅस हा सायकल चालवण्यावर अवलंबून होता. टास्कच्या दरम्यान उषा नाडकर्णी यांची सायकल चालवण्याची वेळ येते. मात्र त्या वयस्कर असल्यामुळे अर्चना गौतम त्यांना सायकल चालवण्यासाठी मदत करते. सायकल चालवता चालवता अर्चना थकते आणि सायकल चालवणे थांबवते.

दुसरीकडे राजीवचा पदार्थ तयार नसतो. त्यामुळे त्याला गॅसची गरज असते. तो अर्चनाला ओरडतो की सायकल चालव पण अर्चना ऐकत नाही. हे सर्व पाहून उषा नाडकर्णी खूप भावुक होतात आणि रडू लागतात. उषा ताईला रडताना पाहून अर्चना त्यांना मिठी मारते. पण उषा ताई त्यांना बाजूला जा बोलतात. आता या टास्कमध्ये कोण बाजी मारणार आणि कोणाचा 'सेलिब्रिटी मास्टरशेफ'चा प्रवास थांबणार हे पाहणे मनोरंजक ठरणार आहे.