Gautami Patil News

गौतमीचा कार्यक्रम म्हटलं की, वाद- विवाद, धडाकेबाज डान्स आणि राडा हे समीकरण आपल्याला कायमच पाहायला मिळतं. आता गौतमीची क्रेझ फक्त खेड्यापाड्यातच नाही तर, शहरांतही पाहायला मिळत आहे. दहीहंडीवेळी गौतमीचा मुंबईमध्ये कार्यक्रम झाला होता, त्यावेळी सुद्धा प्रचंड राडा झालेला आपण पाहिला. नुकतंच गौतमीचा कार्यक्रम बारामतीमध्ये पार पडला. विशेष म्हणजे, यावेळी कार्यक्रमामध्ये कोणताही राडा आणि गोंधळ न घालता अगदी शिस्तबद्ध पद्धतीने हा कार्यक्रम पार पडला. बारामती तालुक्यातल्या झारगडवाडीमध्ये कार्यक्रम निर्विघ्न पार पडल्यामुळे गौतमी पाटीलने प्रतिक्रिया दिली आहे.

बारामतीतील झारगडवाडी येथे शुक्रवारी पार्थ पवार युथ फाउंडेशनच्या वतीने दहीहंडीनिमित्त गौतमी पाटीलच्या डान्सचे आयोजन करण्यात आले होते. नेहमीप्रमाणे गौतमीचा कार्यक्रम म्हटल्यावर शेजारच्या गावातल्या लोकांनीही प्रचंड गर्दी केली होती. यावेळी मेखळीतील भैरवनाथ दहीहंडी संघाने येथील दहीहंडी फोडली. गावकऱ्यांच्या उत्तम व्यवस्थापनामुळे, उपस्थितांनी दिलेल्या सहकार्यामुळे आणि सर्वांनी शिस्तीचे पालन केल्यामुळे झारगडवाडीतील कार्यक्रम अतिशय शिस्तबद्ध झाला. गौतमीने आयोजकांनी केलेल्या नियोजनाचे कौतुक केले असून मला कार्यक्रम आवडल्याची प्रतिक्रिया गौतमी पाटीलने प्रसार माध्यमांना दिली.

एकंदरीतच कार्यक्रमाविषयी गौतमी बोलली, “झारगडवाडी येथे पार्थ पवार युथ फाउंडेशनच्या वतीने दहीहंडीनिमित्त आयोजित केलेल्या कार्यक्रमाचे आयोजन खूपच उत्तमरित्या करण्यात आलं होतं. अगदी कार्यक्रम शिस्तप्रिय झाल्यामुळे मला कार्यक्रमामध्ये कोणत्याही प्रकारचा त्रास झाला नाही. उपस्थितांनीही कोणत्याही प्रकारचा गोंधळ न घातल्यामुळे कार्यक्रम चांगल्या प्रकारे पार पडला. माझा कार्यक्रम म्हटलं की, गोंधळ आणि राडा होतोच असं काही नाही. पण काही अपवाद सोडले तर, माझे कार्यक्रम सुरळीत पार पडले आहेत. माझ्या कार्यक्रमाला कायमच टार्गेट केलं जातं. माझ्या प्रत्येक कार्यक्रमात असं घडत नाही.”

घुंगरू चित्रपटाचे प्रदर्शन येत्या काही दिवसात असून चित्रपट प्रेक्षकांनी पहावा. लवकरच चित्रपटातील आणखी एक गाणं सुद्धा प्रेक्षकांच्या भेटीला येणार आहे. पण हे गाणं प्रेक्षकांसाठी सरप्राईज असणार असल्याची प्रतिक्रिया गौतमी पाटीलने दिली आहे.