Saif Ali Khan Attack News : तीन दिवसांपासून मुंबई पोलिसांना गुंगारा देणारा सैफवरील हल्लेखोर अखेर पोलिसांच्या तावडीत सापडलाच. मुंबई पोलिसांची अनेक पथकं वेगवेगळ्या दिशेने तपास करीत होते. अगदी मध्य प्रदेशपर्यंत पथक पोहचलं होतं. वांद्रे, दादर परीसरातील शेकडो सीसीटीव्ही फुटेज पोलिसांनी चेक केलं होतं. हल्ल्यानंतर दादरमध्ये एका मोबाईल दुकानाच्या सीसीटीव्हीत दिसलेला हल्लेखोर नंतर कुठे लपला हे गुढ होतं. पण मुंबई पोलिसांनी प्रयत्नांची शर्थ करत अखेर त्याला पकडलंच. ठाण्यातील हिरानंदानी इस्टेटच्या परिसरातील लेबर कॅम्पमधून त्याला अटक केली. धक्कादायक बाब म्हणजे त्याचं बांग्लादेशी कनेक्शन समोर आलंय.

सैफवर हल्ला, आरोपीला बेड्या

- आरोपीचं नाव मोहम्मद शरीफुल इस्लाम शेहजाद

- आरोपीकडून बांगलादेशी मतदार कार्ड जप्त

- आरोपी 6 महिन्यांआधी मुंबईत आला, 3 नावं बदलली

- आरोपीचं विजय दास, बिजॉय दास नावानं ठाण्यात वास्तव्य

- सैफ अली खानवर हल्ला केल्याची कबुली

आरोपी शेहजादला वांद्रे कोर्टाने 5 दिवसांची पोलीस कोठडी सुनावली आहे....आरोपीकडे भारतीय असल्याचे पुरावे नाहीत. भारतात घुसल्यानंतर आरोपी त्याच नाव बदलत होता.ठाण्यातल्या एका बारमध्ये तो हाऊसकिपींगचही काम करत होता. मालकाकडून त्यानं पैसे घेतले होते. बांगलादेशात तो पळ काढण्याच्या तयारीत असतानाच पोलिसांनी त्याला बेड्या ठोकल्यात.

सैफवर हल्ला केल्यानंतर आरोपीनं एकाला कॉल केला होता. त्यानंतर त्यानं फोन बंद केला होता. या एका कॉलवरुन पोलिसांना ठाण्याच्या त्याच्या वास्तव्यापर्यंतचे धागेदोरे सापडले. आरोपीने हल्ला केला तेव्हा परिधान केलेला काळा टी शर्ट, गुलाबी गमछा तसंच त्यानंतर बदललेला निळा शर्टही पोलिसांनी जप्त केला. आरोपीला पकडलं तेव्हा त्याच्याकडे कोयता सापडल्याची माहिती मिळतेय. आरोपी शेहजाद वरळी येथील एका कॅफेमध्येही सफाईच काम करत असे. जवळच असलेल्या जनता कॉलनीत तो वास्तव्याला होता. हल्ला नंतर तो वरळीत राहिल्याची माहिती समोर आली आहे. मुख्यमंत्र्यांनी नुकतंच बांग्लादेशी घुसखोरांच्या प्रश्नावर बोट ठेवुन कडक कारवाईची ग्वाही दिली होती. सैफवरील हल्लानंतर हा प्रश्न पुन्हा ऐरणीवर आलाय.