बॉलिवूडचा सुपरस्टार आणि महाराष्ट्राचा भाऊ रितेश देशमुख (Riteish Deshmukh) सध्या 'बिग बॉस मराठी 6' मुळे चांगला चर्चेत आहे. जानेवारी महिन्यापासून प्रेक्षकांचा आवडता शो 'बिग बॉस मराठी 6' सुरू होणार आहे, ज्याचे होस्टिंग रितेश देशमुख करणार आहे. अशात आता रितेशने सोशल मीडियावर एक खास पोस्ट केली आहे. ज्याने सर्वांचे लक्ष वेधून घेतले आहे.

रितेश देशमुख गेल्या काही काळापासून आपला आगामी चित्रपट 'राजा शिवाजी'च्या शूटिंगमध्ये व्यस्त होत. हा रितेश देशमुखच्या आयुष्याचा ड्रीम प्रोजेक्ट आहे. त्यामुळे चाहते देखील चित्रपट पाहण्यासाठी खूप उत्सुक असल्याचे दिसत आहे. अलिकडेच रितेशच्या चित्रपटाच्या सेटवरील फोटो व्हायरल झाला होता. आता अखेर चित्रपटाचे शूटिंग संपले आहे. या चित्रपटात बॉलिवूडचे अनेक सुपरस्टार झळकणार आहेत.

रितेश देशमुखची पोस्ट

"क्षणभर थांबलेला सूर्य..

मावळतीचा मावळ..

पण क्षणभरासाठीच…

उद्याच्या तेजस्वी पहाटे साठी"

१०० दिवसांची मेहनत, निष्ठा, समर्पण आणि अपार जिद्द यावर अखेर पडदा पडला. असंख्य आठवणी, असंख्य अनुभव आणि मनात कायम राहणारे क्षण. महापराक्रमी राजाधिराज छत्रपती शिवाजी महाराजांना सिनेमारूपी अभिवादन घेऊन लवकरच येत आहोत !!!"

चित्रपटाची रिलीज डेट?

'राजा शिवाजी' चित्रपट नवीन वर्षात 2026 ला रिलीज होणार आहे. सिनेमा 1 मे म्हणजे महाराष्ट्र दिनाला प्रेक्षकांच्या भेटीला येणार आहे. तसेच चित्रपट मराठी, हिंदी, तमिळ, तेलुगू, कन्नड, मल्याळम भाषांमध्ये रिलीज होणार आहे.

चित्रपटातील गाण्यांना अजय-अतुलचे संगीत आहे. चित्रपटात रितेश देशमुखसोबत जिनिलीया देशमुख, संजय दत्त, विद्या बालन, अभिषेक बच्चन, महेश मांजरेकर, सचिन खेडेकर, भाग्यश्री, फरदीन खान, जितेंद्र जोशी, अमोल गुप्ते हे तगडे कलाकार पाहायला मिळणार आहेत.