थिएटरमध्ये धुमाकूळ घालत असलेला 'देऊळ बंद २' चित्रपट २१ मे ला (गुरुवारी) प्रेक्षकांच्या भेटीला आला. दोन दिवसांत चित्रपटाने बक्कळ कमाई केली आहे. चित्रपटाची कथा, संवाद आणि दिग्दर्शन प्रवीण तरडे यांनी केले आहे.'देऊळ बंद -2' चित्रपटाचा मुख्य हेतू शेतकऱ्यांच्या आत्महत्यांना आळा घालणे आणि आत्महत्या करून शेतकऱ्यांचे प्रश्न सुटत नाहीत, तर बदलत्या परिस्थितीनुसार शेतीत बदल करण्याची गरज आहे, असा ठाम संदेश देणे हा आहे.

'देऊळ बंद २' चा पहिला भाग 'देऊळ बंद' २०१५ मध्ये प्रदर्शित झाला होता. 'देऊळ बंद' मध्ये मराठी अभिनेता गश्मीर महाजनी मुख्य भूमिकेत होता. अशात आता 'देऊळ बंद २'च्या शेवटी गश्मीर महाजनी म्हणजेच राघव शास्त्रीची धमाकेदार एन्ट्री पाहायला मिळते. याचा व्हिडीओ सोशल मीडियावर तुफान व्हायरल होत आहे. ज्यामुळे 'देऊळ बंद ३' येणार असल्याची चर्चा रंगली आहे.

सोशल मीडियावर एक व्हिडीओ व्हायरल होत आहे. ज्यात तुम्ही पाहू शकता की, राघव शास्त्री अमेरिकेत आपल्या कंपनीत असताना त्याला स्वामींचा फोन येतो. स्वामी त्याला म्हणतात, "मी अक्कलकोटहून स्वामी समर्थ बोलतोय, तुला मी आठवतोय का? India@11 " हे ऐकताच राघव शास्त्रीला मोठा धक्का बसतो. गश्मीर म्हणतो, "ओह माय गॉड" त्यावर स्वामी म्हणतात, "येस माय डार्लिंग, आय एम युअर गॉडच... काय म्हणतेय तुझी अमेरिका? काय म्हणतोय तुझा डोनाल्ड ट्रम्प?" त्यावर राघव म्हणतो, "आज 10 वर्षांनी माझी कशी काय आठवण झाली?" त्यावर स्वामी म्हणतात, "तुझ्या सारख्या एका नास्तिकाला मार्गी लावून आलोय. तुझ्या मनातील नास्तिकता कमी नाही झाली?" त्यावर राघव शास्त्री म्हणतो, "तुम्हाला माझ्या मनात किती अस्तिकता आहे हे पाहण्यासाठी अमेरिकेत यावंच लागेल महाराज..." हे बोलताच स्क्रीनवर 'देऊळ बंद ३' ची घोषणा होते. लिहिलेले दिसते की, 'देऊळ बंद ३-आत्मनिर्भर भारत'

'देऊळ बंद ३' च्या घोषणेचा हा व्हिडीओ सोशल मीडियावर तुफान व्हायरल होत आहे. यावर नेटकरी कमेंट्सचा पाऊस पाडत आहेत. आता राघव शास्त्री आणि स्वामींना एकत्र पाहायला चाहते उत्सुक आहेत. तसेच स्वामी आता थेट अमेरिकेतून प्रेक्षकांशी, भक्तांशी संवाद साधणार आहे.