राष्ट्रवादी शरदचंद्र पवार गटाचे अध्यक्ष शरद पवार यांची काल अचानक सभेतच तब्येत बिघडली होती. बारामती लोकसभा मतदारसंघामध्ये वेगवेगळ्या ठिकाणी दिवसभर रविवारी सभा होत्या. पण त्यांची बारामतीतील सभेत अचानक तब्येत बिघडली. त्यामुळे आजचे त्यांचे सर्व कार्यक्रम रद्द करण्यात आले आहे. त्यांची तब्येत अचानक बिघडल्यामुळे सर्वच त्यांच्या तब्येतीची विचारपूस करीत आहेत. अशातच मराठमोळा अभिनेता आणि दिग्दर्शक हेमंत ढोमेनेही त्यांच्या तब्येतीची विचारपूस केली आहे.

हेमंत ढोमेने सोशल मीडियावर पोस्ट लिहित मोजक्या शब्दात त्यांची तब्येतीची काळजी केली आहे. अभिनेत्याने आपल्या पोस्टमध्ये लिहिलंय की, "आदरणीय साहेब… आपली मेहनत घेण्याची क्षमता आणि चिकाटी आम्हा तरूणांना देखील थक्क करणारी आहे… पण कृपया स्वतःची काळजी घ्या… तब्येत जपा… खंडोबा आपणांस लवकरात लवकर बरे करो…" अभिनेत्याने एक्सवर त्यांचा फोटो पोस्ट करत ही पोस्ट शेअर केलेली आहे. (Social Media)

हेमंतच्या ह्या पोस्टवर अनेक चाहत्यांनी शरद पवार लवकरात लवकर बरे व्हावे अशी कमेंट केली आहे. उद्या (७ मे) तिसऱ्या टप्प्यात राज्यातील ११ जागांसह देशातील ९४ मतदार संघात मतदान होणार आहे. लोकसभेच्या निवडणूकीच्या तिसऱ्या टप्प्यामध्ये राज्यामध्ये, रायगड, बारामती, धाराशिव, लातूर, सोलापूर, माढा, सांगली, सातारा, रत्नागिरी- सिंधुदुर्ग, कोल्हापूर आणि हातकणंगले या मतदार संघात निवडणूका होणार आहेत.