कलर्स मराठी वाहिनीवरील 'पिंगा गं पोरी पिंगा' (Pinga Ga Pori Pinga) मालिका प्रेक्षकांचे भरपूर मनोरंजन करत आहे. मालिकेत आता नवीन वळण आले आहे. 'पिंगा गं पोरी पिंगा' मालिकेत नेहमीच आधुनिक स्त्रियांचा आत्मविश्वास, त्यांची स्वप्नं आणि मैत्री दाखवली गेली आहे. आता पिंगा गर्ल्सच्या आयुष्यात नवा आनंद येणार आहे. सुखाची चाहूल लागली आहे. पिंगा गर्ल्सपैकी एक त्यांची मैत्रीण प्रेरणा लवकरच आई होणार आहे.

स्वतःच्या करिअरमध्ये पुढे गेलेली, आत्मनिर्भर आणि स्वप्नाळू प्रेरणाला आता मातृत्वाचे सुख लाभणार आहे. तिने दिलेल्या या गोड बातमीमुळे बाकीच्या सगळ्या मैत्रिणींच्या आनंदाला उधाण आले आहे. या सर्वात इंदू वल्लरीला म्हणते "प्रेरणेला बाळ होणार, पण तुला नाही म्हणजे काहीतरी कमी आहे तुझ्यात." या बोलण्यावरून वल्लरी आणि मनोज खूप अस्वस्थ होतात. त्यांच्या नात्यावर या गोष्टीचा कोणता परिणाम होणार? हे बघणे उत्सुकतेचे असणार आहे.

'पिंगा गं पोरी पिंगा' मालिकेत आता आनंदाचे वळण आले आहे. या सगळ्यात पिंगा गर्ल्स पुन्हा एकत्र येतात. प्रेरणाच्या या नव्या प्रवासात तिच्या पाठीशी उभं राहतात. एकमेकींना दिलेला आधार आणि खरी मैत्री यामुळे मालिकेत पुन्हा एकदा भावनिक रंग भरणार आहेत. सर्व मैत्रिणी मिळून प्रेरणा आई होणार असल्याचा आनंद साजरा करतात.

दुसरीकडे मिठू अचानक परतल्याने सगळ्यांनाच खूप आनंद होतो. एका बाजूला प्रेरणाचं मातृत्व, दुसऱ्या बाजूला वल्लरीची लढाई आणि मिठूचं पुनरागमन या सगळ्यामुळे पिंगा गर्ल्सचे पुढील भाग भावनिक आणि प्रेक्षकांना स्क्रीनसमोर खिळवून ठेवणारे असणार आहे. तसेच मिठूला तेजा आणि हर्षितच्या नात्याबद्दल समजताच ती कशी प्रतिक्रिया देणार हे पाहणे महत्त्वाचे ठरणार आहे. 'पिंगा गं पोरी पिंगा' मालिका कलर्स मराठीवर संध्याकाळी 7.30 वाजता पाहायला मिळते.