Hingoli News : हॉस्टेलमध्ये मुलीचा आत्महत्येचा प्रयत्न; लटकलेली होती, इतक्यात मैत्रिणी आल्या अन् जीव वाचला

भारत नागरे, साम टीव्ही, प्रतिनिधी

Hingoli News : हिंगोलीतून एक धक्कादायक प्रकार घडला आहे. बारावीमध्ये शिकणाऱ्या एका विद्यार्थिनीने खोलीत गळफास लावून आत्महत्या करण्याचा प्रयत्न केला आहे. मैत्रिणी खोलीत आल्याने विद्यार्थिनीचा जीव वाचला असल्याची माहिती समोर आली आहे. शासकीय वसतीगृहात राहणाऱ्या विद्यार्थिनीने आत्महत्या का केली याचा तपास पोलीस करत आहेत.

पोलिसांनी दिलेल्या माहितीनुसार, ही विद्यार्थिनी हिंगोलीत समाज कल्याण विभागाच्या शासकीय वसतीगृहामध्ये राहते. या विद्यार्थिनीने राहत्या खोलीत गळफास लावण्याचा प्रयत्न केला. त्याच वेळी तिच्या मैत्रिणींनी खोलीत प्रवेश केला. त्यांनी आत्महत्या करणाऱ्या विद्यार्थिनीला वाचवले. त्यानंतर पीडितेला वसतीगृहातून रुग्णालयात नेण्यात आले.

पीडित विद्यार्थिनीला गळफास घेतलेल्या अवस्थेत हिंगोलीच्या शासकीय रुग्णालयात दाखल करण्यात आले. प्राथमिक उपचार केल्यानंतर तिला पुढील उपचारासाठी हिंगोलीतून नांदेडला हलवण्यात आले. पीडितेची प्रकृती नाजूक असल्याची माहिती समोर आली आहे. सध्या नांदेडमधील रुग्णालयात तिच्यावर उपचार सुरु आहेत.

बारावीत शिकणाऱ्या विद्यार्थिनीने गळफास लावून जीव देण्याचा प्रयत्न का केला यामागील कारण अद्याप अस्पष्ट आहे. या प्रश्नाचे उत्तर शोधण्यासाठी हिंगोली पोलिसांनी तपास करायला सुरुवात केली आहे.