लोकांना मनोरंजनाची आयुष्यात नितांत गरज असते. गेले अनेक वर्षे मनोरंजन क्षेत्र त्यासाठी काम करत आहे. त्यामध्ये महाराष्ट्रात चांगलेच गाजणार कॉमेडी शोचा समावेश असतो. त्यातीलच महाराष्ट्राची हास्यजत्रा या लोकप्रिय कार्यक्रमातून घराघरात पोहोचलेला अभिनेता निखिल बने पुन्हा एकदा चर्चेत आला आहे. कारण, त्याने सोशल मीडियावर शेअर केलेली पोस्ट सध्या सर्वांचं लक्ष वेधून घेत आहे. यामध्ये निखिलने फायनली 'ती' आली अशी पोस्ट शेअर केली आहे. निखिलचा हा आनंद कसला आहे? हा प्रश्न अनेक चाहत्यांना पडलेला आहे.

निखिलच्या आयुष्यात फायनली 'ती' आली असून यामुळे तो खूप आनंदात आहे. आता अनेकांना प्रश्न पडला असेल की, ही ‘ती’ नेमकी कोण? यावर चाहत्यांची उत्सुकता दूर करत निखिलने सांगितलं की, ही 'ती' दुसरी कोणी नसून त्याची नवीकोरी स्वप्नातील बाईक आहे. निखिलला अनेक दिवसांपासून स्वतःसाठी ड्रीम बाईक घ्यायची इच्छा होती. अखेर त्याचं स्वप्न पूर्ण झालं आहे. त्याने Triumph Scrambler XC 400 ही आकर्षक बाईक खरेदी केली आहे. या बाईकसोबतचे खास फोटोशूटही त्याने सोशल मीडियावर शेअर केलं आहे. बाईक खरेदी करताना त्याचे कुटुंबीय आणि जवळचे मित्रही त्याच्यासोबत होते.

नवीन बाईकसोबतचा हा आनंदाचा क्षण निखिलने चाहत्यांशी शेअर केला आणि लगेचच त्याच्या पोस्टवर शुभेच्छांचा वर्षाव झाला. मराठी कलाकार प्रथमेश शिवलकर, सौरभ चौघुले, नम्रता संभेराव यांसारख्या सहकलाकारांनी त्याचं भरभरून कौतुक केलं. चाहत्यांनीसुद्धा कमेंट्स करून अभिनंदनाचा वर्षाव केला आहे.

दरम्यान, 'महाराष्ट्राची हास्यजत्रा' या कार्यक्रमामुळे निखिलला प्रचंड लोकप्रियता मिळाली आहे. त्याचा चाहतावर्ग मोठ्या प्रमाणावर असून तो सोशल मीडियावर नेहमीच सक्रिय असतो. अलीकडेच गणपतीनिमित्त तो चिपळूण गावी गेला होता. त्याने शेअर केलेल्या कोकणातील गणेशोत्सवाच्या व्हिडीओलाही चाहत्यांकडून उत्तम प्रतिसाद मिळाला होता. आता त्याच्या आयुष्यात आलेल्या या नवीन गाडीमुळे निखिलचं सर्वत्र कौतुक होत आहे. चाहत्यांनीही त्याच्या नव्या प्रवासासाठी शुभेच्छा दिल्या आहेत.